Jessabelle : فيلم رعب ضعيف
ثبت بالدليل القاطع، ان أفلام الرعب الهوليودية مش بتعجبنا، وبنحس انها بالكامل عبارة عن مجموعة من التيمات المملة والمكررة واللى بيتعاد تقديمها فيلم بعد فيلم، فقط للدفع باصدار جديد للسينمات، ولاستغلال جيوب المشاهدين الباحثين عن جرعة من الرعب حتي لو كانت مكررة ومعاده.
Jessabelle فيلم بيروح لأبعد من كده كمان، لانه فى الاساس مش بيقدم الرعب بمعني الرعب، لكنه بيقدم مجموعة من المشاهد المعتمدة على (خض) الجمهور واللعب على جهازهم العصبي، الأمر اللى بيتحول لعاده بعد عدة مشاهد، ومع نهاية الربع الاول من الفيلم بيفقد المشاهد اي احساس بالرعب وبيتبقى عند بعض المشاهدين – زينا – احساس بالسخط على التجربة السينمائية كلها.
من تأليف روبرت بن جارانت وأخراج كيفين جيروتارت بنشوف (سارة سنوك) فى دور (جيسي)، الفتاة الشابة اللى بتتعرض لحادثة ضخمة وهي بتستعد للانتقال فى منزل حبيبها، الحادثة اللى بتغير حياتها وبتخليها تفقد القدرة على السير مؤقتا، الامر اللى بيضطرها للاتصال بوالدها لنقلها من المستشفى، خاصة انها ما اصبحش عندها مأوي حاليا.
مع انتقالها للحياة مع والدها، ومع غرابة اطواره، بتبدأ (جيسي) فى استكشاف المنزل وبتعثير على مجموعة من شرائط الفيديو اللى سابتها لها والدتها قبل وفاتها، الشرائط اللى بتغير حياتها للأبد وبتخليها تبدأ تشوف كائنات ما ورائية واحداث – المفروض – انها مرعبة.
زى ما قولنا الرعب فى الفيلم معتمد على المشاهد المفاجئة، الاسلوب الاسهل فى افلام الرعب، واللى بيعتمد عليه اى مخرج عاوز يقدم للسوق فيلم مستهلك اخر والسلام، وده اللى حصل مع Jessabelle ، وللاسف اى محاولة للاثارة فشلت تماما، للدرجة اللى جعلتنا مستنتجين احداث خصوصا فى الربع الاخير اللى كان – المفروض – بيحمل كل جرعة الاثارة فى الاحداث.
الموسيقي التصويرية كانت تقليدية ولم تقدم اى جديد، لكن الديكورات والمشاهد الواسعة كانت متميزة لكنها كانت قليلة جدا، اما المؤثرات الخاصة والخدع، اللى المفروض يعتمد عليها اى فيلم رعب بالمقام الاول، كانت ضعيفة جدا وغير متقنة على الاطلاق.
Jessabelle فيلم رعب ضعيف ومستهلك، شوفوه لو بس كنتم من عشاق افلام الرعب مهما كانت درجة ضعفها!
