Jexi : السمارت فون بتاعك… عاوز يدمرك!
مانقدرش ننكر أن انتشار التكنولوجيا الحديثة والسمارت فون واحدة من أحسن الحاجات اللي حصلت لجيل كامل من الشباب والكبار. كل حاجه أصبحت سهلة ومتاحة. من البحث عن معلومة لحجز سيارة أجرة!
لكن فيلم Jexi بيناقش التكنولوجيا الحديثة من منطلق مختلف تماما من خلال قصة فيل (قام بدوره أدم ديفاين) اللي مكانش له علاقة كبيرة بالتليفونات الذكية، لكن مع اجباره على تحديث تليفونه بيلتقي المساعد الصوتي Jexi (زي أليكسا وسيري كده) واللي بتحاول تنظم له حياته وتديرها بشكل جديد ومختلف.
لكن مع تطور العلاقة بين الاتنين بتحاول تدمر حياته وتسيطر عليها بالشكل السيء مش الجيد. ياترى ايه اللي هايحصل؟
Jexi مش الفيلم الأول اللي يتناول الجانب المظلم للتقنية الحديثة في حياتنا. لكن المميز في الفيلم انه بيتناولها بشكل كوميدي. بعيدا عن (السوداوية) اللي كانت الغالبة على بعض الأفلام زي Her أو Ex-Machina وغيرها.
والمميز في كوميديا الفيلم انها جامعه بين الكوميديا الشيقة اللي تخلينا نضحك وفي نفس الوقت نفكر في سيطرة وسائل التواصل الحديثة علينا. والفضل هنا يعود لتمثيل أدم ديفاين. وطبعا الأداء الصوتي لـ روز بيرن في دور المساعد الصوتي Jexi
ولأن روز بيرن سجلت صوتها على الفيلم بعد نهايته علشان تقدر تظبط انفعالاتها، أدم ديفاين كان بيأدي كتير من المشاهد بدون ما يسمع صوتها في ودنه بشكل حقيقي. وده يعرفنا مدى قدرته على التخيل وتوصيل مشاعره للمشاهدين باحترافية.
يمكن من الأمور اللي ضايقتنا هي تتابعات نهاية الفيلم واللي وضعت Jexi في شكل اسطوري شويه. لكن حاجات زي دي مفهومة في اطار السيناريو اللي عاوز يعكس لنا ايه اللي ممكن يحصل لو توحش الذكاء الصناعي وقرر يعادينا.
Jexi فيلم مهم وقوي متنكر في صورة فيلم كوميدي. والمميز أنك سواء عاوز تشوفه كفيلم فلسفي او كوميدي هاينجح في الحالتين.
