Jigsaw: الرعب الدموي يضرب في الهالوين
لازم أطباء علم النفس يجدوا حل للمعضلة النفسية الغريبة اللي بتخلي كتير من المشاهدين يدخلوا أفلام الرعب، ولما تيجي اللحظات المرعبة يخبوا وجوههم ويبقوا مش عاوزين يتفرجوا عليها! هي دي الحالة اللي ها نلاقي علشها معظم مشاهدي فيلم Jigsaw في السينمات!
القصة
الفيلم بيحكي عن سلسلة من جرائم القتل اللي بيتم تنفيذها بعنف ووحشة وبتخطيط مسبق، وبشكل بيفكرنا بسلسلة الجرائم السابقة اللي شوفناها في أجزاء SAW السابقة، لكن المحققين بيحاولوا يجاوبوا على السؤال الأهم: ازاي الجرائم دي بتحصل بينما العقل المدبر لها المفروض أنه مات من فترة طويلة؟!
فريق العمل
الفيلم من أخراج مايكل وبيتر سبيريج ومن تأليف بيت جولدفينجر و جوش ستولبيرج ومن بطولة لورا فانديرفوورت و توبين بيل و بريتاني آلن و كالوم كيث رينيه و مات باسمور و هانا إميلي آندرسون
الأداء التمثيلي
بنعتقد أن الفنانين اللي بتقوم بأدوار البطولة في SAW بأجزاؤه بيقوموا بأسهل أدوارهم على الإطلاق: تمثيل الرعب بكافة أشكاله وصوره بداية من الصراخ بأعلى صوت وحتى طلب النجدة من الجميع بدون فائدة، وفي النهاية بيموت جميع الأبطال بأبشع الطرق الممكنة، وفي رأينا أن البطل الحقيقي لسلسلة الأفلام دي بيكون الإخراج وفريق الخدع السينمائية وطبعا المؤلف اللي عنده كل القدر ده من الدموية!
السيناريو والحوار والأخراج
سيناريو الفيلم بيمشي في نفس السكة اللي شوفناها في باقي الأجزاء، لكن المرة دي بنشوف محاولات أقوى لتدخل الشرطة لمنع الجرائم من الحدوث، وطبعا تفنن السيناريو في خلق مجموعة من السيناريوهات المرعبة للعبة الموت، واللي لاحظنا فيها تطورات كبيرة وتنويعات على نفس فكرة اللعبة اللي مصيرها الموت أو الحياة لكن مع تعلم درس جديد بالطريقة الصعبة.
الديكورات والموسيقى والأزياء
طبعا من أروع ما يكون في الفيلم هو الديكورات الداخلية اللي تم تصميمها بعناية علشان تحقق الغرض من شعور المشاهدين أنهم بأنفسهم داخل لعبة الموت، والموسيقى التصويرية اللي كانت بتلاحقنا طوال الوقت في تجربة المشاهدة، وطبعا لا يمكن ننسى الخدع واللي تمت على أعلى مستوى بحيث لا نشعر في مشهد واحد أن هناك أي تمثيل أو خداع في المشاهد.
الخلاصة
لو معدتك بتستحمل المشاهد الدموية الصعبة.. في الحالة دي بس ننصحك تشوف Jigsaw
علشان تبقى عارف: الفيلم يعتبر أول فيلم في السلسلة يتم اذاعته بعد أكتر من سنة واحدة على الجزء السابق.
