John Wick: Chapter 3 – Parabellum : جون ويك ضد العالم!

المميز في الجزء الثالث من سلسلة أفلام جون ويك، إنه مش بيدي للمشاهدين وقت التقاط الأنفاس. حتى أن الأحداث نفسها بتبدأ من لحظة نهاية الجزء الثاني مباشرة. وكأن مخرج الفيلم  تشاد ستاهيلسكي عاوز يقول لنا: انتو بقيتوا عارفين القواعد.. تعالوا نشوف ايه اللي هايحصل علطول!

الجزء الثالث من سلسلة أفلام جون ويك بينتهي عند أخر نقطة انتهى فيها الجزء الثاني. بنشوف جون ويك في صراع مفتوح مع المنظمة اللي كانت بتأمن له الدعم والحماية بعد ما خالف واحد من أهم الشروط الخاصة بها. ومن هنا بنبدأ نتعمق أكتر في شخصية جون. ونشوف ايه هي الحلول اللي هايضطر يلجأ لها علشان يحافظ على حياته في ظل شبكة معقدة من المصالح والتربيطات.

المشكلة الأساسية في الفيلم هي أننا عارفين وواثقين تماما أن جون ويك هاينجو. بالتالي فقدنا جزء من حماسنا ناحية القصة. لكن من ناحية تانيه بيكون عندنا دايما تساؤل: هاينجو أزاي وهايعمل ايه؟

وعلى كل الأحوال القصة مش هي أكتر عنصر مثير في الفيلم لأنها محسومة. لكن مشاهد الأكشن الجميل والجديدة هي المثيرة جدا. والحقيقة تقييمنا للفيلم على مستوى الأكشن هو ١٠ من ١٠! الفيلم بيقدم مجموعة ممتازة وجميلة من مشاهد الأكشن بتمتد من أول لقطة لأخر لقطة في الفيلم تقريبا. وكيانو ريفز لعب دور مهم في نجاح المشاهد دي نتيجة تدربة عليها.

لكن لو كنت هاتتفرج على الفيلم علشان متوقع اداء تمثيلي مثلا أو بتدور على الدراما في الفيلم. الحاجات دي تقريبا مش موجوده! وكل اللي بيعمله كيانو ريفز هو اداؤه لمشاهد اكشن وحركة بلا انقطاع. وبشكل عام سلسلة افلام جون ويك مش أحسن أفلام تشوف فيها قصة ودراما.

هل ننتظر جزء رابع من السلسلة؟ نتوقع ده جدا. وننتظره بشوق. ولا انتو ايه رأيكم؟