Jumanji: The Next Level : ماتقدرش تعتمد على النوستالجيا مرتين وتنجح!
لما بندخل فيلم بعد وقت طويل من عرض الجزء الأول منه. جزء كبير منا بيحاول يشوف الفيلم كويس إكراما للنوستالجيا اللي عشناها مع الجزء الأول من الأحداث. ده اللي حصل مع الجزء الثاني من سلسلة جومانجي اللي شوفناه سنة ٢٠١٧ بعد حوالي ٢٢ سنة من عرض الجزء الأول اللي قام ببطولته الراحل روبن ويليامز. لكن بعد ما نشيل عنصر النوستالجيا.. هل Jumanji: The Next Level هايحصد نفس النجاح؟
Jumanji: The Next Level بيحكي عن مغامرة جديدة لنفس الأصدقاء اللي شوفناهم في الجزء السابق. مع لعبة سحرية جديدة لكن المرة دي مع قواعد مختلفة. هاتخلي نجاتهم من اللعبة أصعب. والتحديات المطلوب منهم مواجهتها أصعب وأكثر إثارة للرعب.
على الرغم من زيادة جرعة الأكشن في الفيلم، وروعة مشاهد المطاردات وتصميم الديكورات والخدع السينمائية. لكن كل المشاهدين عارفين أن ماحدش من الأبطال هايموت. بالتالي جزء كبير من الإثارة كان رايح في قدرة المشاهدين على معرفة نهاية الأحداث مهما كان الوصول لها شاق ومثير. يمكن دي النقطة الوحيدة اللي المخرج جاك كاسدان ماوضعهاش في حسابه وهو بيخرج الفيلم. لأنه لو كان فكر فيها كان هايخلي الفيلم له رسالة أعمق أو مستوى أعلى من الكوميديا. وكلها حاجات ماشوفناهاش خالص للأسف.
Jumanji: The Next Level كان عارف كويس أنه فيلم تجاري خفيف بيستغل نجاح الجزء السابق ونوستالجيا الجزء الأسبق. وكان بيلعب على نقاط قوته دي طوال الوقت لكنه مافكرش حتى يقدم أي شيء أبعد من ده. بالتالي فشل في أنه يحتفظ بانتباه المشاهدين لحوالي ساعتين هم زمن الفيلم. وشعرنا بملل خاصة في الربع الأخير من الأحداث.
دواين جونسون أو “ذا روك” بيقدم الأداء التقليدي له واللي متعودين عليه من أعماله السابقة كلها تقريبا. لكنه يظل أداء جيد خاصة في النصف الثاني من الأحداث. كارين جيلان و جاك بلاك كان عليهم العبء الأكبر في التمثيل. لكن الكاست بشكل عام كان كويس ومتعودين عليه من الجزء السابق.
لو بتحب أفلام “ذا روك” والجزء السابق من جومانجي. فيلم Jumanji: The Next Levelهايكون محطة ممتازة بالنسبة لك وفرصة لتقضية حوالي ساعتين في أحداث مثيرة. أما لو بتحب الأفلام اللي لها رسالة وعمق ومغزى. الفيلم ده مش هايكون المثالي لك.
