Jumanji: Welcome to the Jungle: مغامرة جديدة مجنونة
تقريبا مافيش حد ما شافش فيلم جومانجي اللي يعتبر الجزء الأول من فيلم اليوم، وسواء كنت من الناس الأكبر شوية في السن واللي عاصروا فيلم التسعينات تزامنا مع عرضه، أو لو شوفته من خلال قنوات الأفلام بعد كده، أكيد الفيلم كان ممتع وساب داخلنا أثر قوي وجميل. الرائع في الجزء الثاني من جومانجي انه مش بيستغل نجاح الجزء الأول علشان يقدم حالة من النوستالجيا، لكنه بيقدم عناصر نجاحه بنفسه زي ما هانشوف في نقاشنا لفيلم Jumanji: Welcome to the Jungle
القصة
Jumanji: Welcome to the Jungle بيحكي عن مجموعة من المراهقين اللي بيلعبوا لعبة الكترونية بتسحبهم لداخلها وبتغير شخصياتهم بالكامل، وبيكون أمامهم ضرورة استكمال مهمة خاصة باللعبة والا مش هايرجعوا لحياتهم العادية تاني. ياترى هايقدرووا يحققوا المطلوب منهم ولا هايفشلوا في لعبة جومانجي؟!
فريق العمل
الفيلم من اخراج جاك كاسدان ومن تأليف سكوت روزنبرغ ومن بطولة كارين جيلان و دواين جونسون و بوبي كانافال و ميس بايل و كيفن هارت و جاك بلاك
الأداء التمثيلي
الأداء التمثيلي كان منقسم لجزئين. الأول خاص بأبطال الفيلم قبل التحول لشخصيات اللعبة، وللأسف أداؤهم كان ممل جدا وسىء وحسينا أن وجودهم كان لاستقطاب المشاهدين المراهقين والمنتمين لفئات عمرية أصغر.
أما أبطال الفيلم الرئيسيين فكان أداؤهم مميز ومتكامل مع السيناريو والحوار واللي قدروا يقدموا أداء مثالي ومميز وده اللي هانناقشه دلوقت.
السيناريو والحوار والأخراج
في بداية مشاهدتنا للفيلم كنا نتوقع أن الفيلم هايعتمد على نجاح الجزء الأول علشان يخلي المشاهدين يشعروا بالحنين لمشاهدة الجزء الثاني، لكن الفيلم قدر يحقق عوامل نجاحه بنفسه دون الاعتماد على الجزء الأول وده من الأمور اللي جعلتنا نحترم الفيلم جدا.
الديكورات والموسيقى والأزياء
ديكورات الفيلم كانت مميزة واستخدام الخدع السينمائية تم بحكمة واحترافية في نفس الوقت، كمان موسيقى الفيلم كانت حماسية وجميلة وكانت عارفه امتى تسيطر على المشهد وتكون عالية وامتى تنخفض علشان تترك لما مساحة للمشاهدة والمتابعة.
الخلاصة
Jumanji: Welcome to the Jungle فيلم قوي وكوميدي وقادر على اضحاكنا واعجابنا بعيدا عن الجزء الأول من نفس السلسلة ونجاحه.
علشان تبقى عارف:
أعلن النجم (دواين جونسون) على صفحة الفيسبوك الرسمية الخاصة به، أن (كارين جيلان) ستشارك في بطولة الفيلم.
