Just Getting Started: الشباب في القلب مش في السن!

على الرغم من تقدم أبطال فيلمنا في العمر، إلا أنهم قادرين على أنهم يثبتوا لنا في كل مشهد بيقوموا بيه قدرتهم على اضحاك المشاهدين واسعادهم يمكن بشكل مش بنشوفه في كتير من الفنانين الشباب اللي بيقدموا أفلام كتيرة لكن كوميديا قليلة.

تعالوا نتعرف أكتر على Just Getting Started

القصة

Just Getting Started بيحكي عن قصة محامي بيدخل برنامج حماية الشهود، وعضو سابق في الـ FBI بيحصل بينهم مجموعة كبيرة من الخلافات واللي بتفجر مواقف كوميدية كتيرة، لكن لازم ينسوا الخلافات دي لما بتستهدفهم المافيا.. فقط علشان تبدأ مواقف كوميدية أكتر في الحدوث.

فريق العمل

الفيلم من تأليف وأخراج رون شيلتون ومن بطولة مورجان فريمان و تومي لي جونز و رينيه روسو و جلين هيدلي و جو بانتوليانو و شيريل لي رالف

الأداء التمثيلي

زي ما قولنا أبطال الفيلم مورجان فريمان و تومي لي جونز قدروا يقدموا أداء كوميدي متميز جدا، ومكانوش هايقدروا يقدموا الأداء ده منغير الأدوار المساندة في الفيلم واللي ما يقلش دورهم أهمية عن أدوار البطولة في الفيلم.

السيناريو والحوار والأخراج

من الأمور المميزة في الفيلم هي اعتماده بشكل كبير على الكوميديا الناتجة عن المواقف مش عن الايفيهات. وده لا ينفي أن الفيلم فيه ايفيهات كوميدية كتيرة، لكن الغلبة في النهاية كانت للمواقف الكوميدية اللي كانت متفجرة ومميزة جدا. وقدر الأخراج أنه يوازن بين الأكشن وبين الكوميديا بشكل كبير ويقدموا لنا وجبة متوازنة وقوية ومميزة.

الديكورات والموسيقى والأزياء

من عوامل ضعف الفيلم الديكورات والموسيقى التصويرية واللي كان مستواهم أقل من توقعاتنا، لكن بشكل عام مش بنتوقع أن الديكورات والموسيقى تكون مميزة بشكل كبير في فيلم تركيزه الأول والأخير على الكوميديا.

الخلاصة

فيلم Just Getting Started مميز وكوميدي ومناسب جدا للمشاهدة في أجازه نهاية الأسبوع.

علشان تبقى عارف:

على الرغم من تصنيف الفيلم برقم 3.8 من 10 على موقع IMDB الا أن النتيجة تعتبر غير حاسمة لحد دلوقت لأن عدد المصوتين قليل جدا (حوالي 700 شخص).