Justice League: عشاق DC مع مغامرة جديدة
شركات أنتاج أفلام الابطال الخارقين بتحارب بعضها من خلال تقديم أفلام أقوى وأحسن.. وطبعا المستفيد الوحيد من وراء ده هو المشاهدين اللي بيشوفوا في كل فيلم مجموعة جديدة من أقوى وأحسن مشاهد الخدع السينمائية في العالم.
القصة
الفيلم بيحكي قصة بات مان واللي بيستعيد حبه وثقته في البشر من جديد، وبيسعى لتكوين فريق من أصحاب القدرات الخارقة علشان يواجه بيهم شرير جديد. شرير لو تمكن من تحقيق أهدافه العالم بالكامل هايتغير للأسوأ.. والى الأبد.
فريق العمل
الفيلم من أخراج زاك سنايدر اللي تنحي عن استكمال عمله بسبب ظروف انتحار بنته، واستكمل العمل المخرج جوس ويدون، البطولة كانت لـ بن أفليك و جال جادوت و هنري كافيل و جايسون مومو و راى فيشر
الأداء التمثيلي
على الرغم من أن شخصية بات مان تعتبر الشخصية المحورية والمحركة للأحداث، لكن الحقيقة أن بن أفليك في شخصية بات كان عجز عن انه يوصل لنا الأحساس ده، وحسينا طوال الوقت أنه كان مجرد ترس في مكنة عملاقه، ومش عارفين هل ده كان مقصود أن كل الأداء التمثيلي يكون مختلط ببعضه ولا نشعر بتفوق ممثل عن الأخر علشان نشعر في النهاية بروح الفريق في الفيلم أم لا.
السيناريو والحوار والأخراج
سيناريو الفيلم كان واضح وسلسل وخالي من أي تعقيدات، لكن الجزء الأول من الأحداث خلانا نحس أننا زهقانين شويه، لكن بعد كده بتبدأ الأحداث في التسارع، خاصة مع وجود كتير من المشاهد والمواقف الكوميدية واللي كسرت كثير من الثلج بين المشاهد وبين الأحداث.
الديكورات والموسيقى والأزياء
ديكورات الفيلم تضافرت مع المؤثرات الخاصة علشان تقدم لنا في النهاية تجربة بصرية غير عادية، وطبعا تصميمات أزياء الشخصيات الخارقة كانت أكثر من رائعة وكان واضح البذخ الأنتاجي والتقدم التكنولوجي الكبير اللي وصلت له هوليود مؤخرا.
الخلاصة
فيلم Justice League هايعجب كل عشاق DC وطبعا هايضايق محبي Marvel ومتابعي عالمها السينمائي.
علشان تبقى عارف:
زاك سنايدر مخرج الفيلم فوجئ بانتحار بنته أثناء إخراج الفيلم علشان كده تنحى عن استكمال عمله وأكمله جوس ويدون
