Kickboxer: Retaliation: تحية لأكشن التسعينات الجميل

قرائنا الأعزاء اللي حضروا فترة الأكشن الجميل أيام التسعينات يفتكروا أفلام فان دام نجم المرحلة دي، والأفلام اللي كانت بتعتمد بشكل كبير على المهارات القتالية ومشاهد استعراض الضربات المختلفة وطريقة أدائها. فيلم Kickboxer: Retaliationبينتمي للفئة دي من الأفلام وبينتصر لها.. تعالوا نتعرف أكتر عليه

القصة

Kickboxer: Retaliation بيحكي عن بطلنا (كورت سلون) واللي بيجد نفسه في مواجهة مقاتل عملاق وشرس في تايلاند.. مواجهة حاسمة لو انتصر فيها هايحصل على مبلغ ضخم وعلى وعد بحصوله على حريته. لكن هل هايقدر كورت فعلا ينتصر في المواجهة الدامية؟

فريق العمل

الفيلم من تأليف وإخراج ديمتري لوجوثيتيس ومن بطولة آلاين موسي و كريستوفر لامبرت و جان كلود فان دام و مايك تايسون واللي بيظهروا مع بعض للمرة الأولى على شاشة السينما

الأداء التمثيلي

الأداء التمثيلي للأبطال كان ضعيف على حساب الأداء الحركي اللي كان أفضل واقوى. يعني الأبطال كان عندهم قدرات حركية ممتازة وقدرة على أداء مشاهد الصراع بأفضل من المشاهد التمثيلية نفسها، وكان على المخرج انه يحاول يطلع من أبطاله أي أداء تمثيلي يخدم بيه المنطقة الدرامية في الفيلم أفضل من اللي شوفناه على الشاشة.

السيناريو والحوار والأخراج

سيناريو الفيلم كان مهتم بالمقام الأول بمشاهد الصراع اليدوي والالتحام والقتال على حساب مشاهد الدراما أو الحبكة على مستوى القصة، ومن الواضح أن الفيلم كان عارف كويس الجمهور الخاص به وبيستهدفهم من المشهد الأول، وده في حد ذاته مش عيب لكن كنا نتوقع شوية اهتمام بالفيلم على مستوى الحبكة أو القصة.

الديكورات والموسيقى والأزياء

ديكورات الفيلم والموسيقى الخاصة به كانت من أضعف ما يكون، وفي النوعية دي من أفلام الأكشن بيكون الاهتمام بالديكورات والموسيقى أقل ما يمكن على حساب مشاهد الأكشن اللي جاء إخراجها جيد وبيستهدف المشاهدين الشباب والمراهقين.

الخلاصة

فيلم Kickboxer: Retaliation ممتاز لمحبي أفلام الأكشن التسعيناتي الجميل

علشان تبقى عارف:

تقييم الفيلم على IMDB 5  من 10