Kidnapping Mr. Heineken : الرجل والمشروب.. والاختطاف!
تقريبا كلنا عارفين بيرة (هينكن) الشهيرة.. بعضنا فقط يعرف فريدي هينكن، الراجل اللى وراء البيرة الاشهر فى العالم، والملياردير صاحب اطول واكبر خط انتاج لمشروب الشعير الشهير فى العالم. لكن قلة قليلة فقط هى اللى تعرف انه تعرض لمحاولة اختطاف فى الثمانينات.. الفيلم بيتكلم عن المحاولة دي.
المخرج دانيل الفريدسون بيبدأ احداث فيلمه من امستردام.. مجموعة من الشباب العاطل بتحاول تطلب قرض من احد البنوك، الا ان الازمة المالية العالمية اللى ضربت اوروبا فى الفترة دي، جعلت البنك يتعنت فى اعطائهم القرض. الامر اللى جعلهم يفكروا فى الاتجاه للجريمة، وخطف واحد من اشهر واهم رجال الصناعه فى هولندا فى الفترة دي – وان لم يكن اشهرهم على الاطلاق – الا وهو فريدي هينكن اللى قام بدوره انتوني هوبكنز.
من اجل التخطيط الجيد للعملية، اعضاء العصابة بيقرروا فى البداية يسطوا على مصرف فى هولندا، ومن ثم بنشوف مشاهد لمطاردات وتبادل اطلاق نار فى شوارع امستردام الرئيسية وممراتها النهرية المشهورة بيها المدينة. وبما ان محرر كايرو360 زار امستردام من فترة طويلة نسبيا، نقدر نقول ان المخرج فشل فى تطويع الكاميرا للعودة بالزمن للوراء فيما يتعلق بالمدينة. لانها ظهرت بثوبها الحالى فى الاحداث بدون اى محاولة لمداراة زمن الاحداث رغم ان الفيلم بيتعرض لاحداث بتدور فى الثمانينات.
الناس اللى بتحب تتابع اخطاء الافلام ايضا قالوا ان بيرة هينكن كان لونها بني غامق فى الفترة دي –شكل الزجاجه- لكنها ظهرت فى احداث الفيلم بلونها الاخضر العادي اللى بيتم تصنيعها به فى الفترة الحالية، الامر اللى يعتبر سقطة جديدة للمخرج.
الاداء التمثيلي للابطال كان قوي ومتميز وقدر يحسسنا بحالة التضارب واليأس اللى بتصيب المجرمين قبل تحولهم للاجرام، ايضا الديكورات فيما يتعلق بمكان احتجاز (هينكن) كانت قوية ومتميزة. وبعض المشاهد دفعتنا للتركيز بشدة وحبس انفاسنا من فرط التوتر. لكن الفيلم بشكل عام بيأتي فى المنطقة المتوسطة من الاثارة والتشويق.
نقدر نقول ان انتوني هوبكنز واداؤه الاستثنائى (بلع) اى اداء تمثيلي اخر على الرغم من تفوق الابطال جيم ستروجس، سام ورثينجتون، ريان كوينتن و غيرهم من باقى الابطال اللى قدروا يقوموا بادوارهم كويس وخصوصا فى النواحي النفسية والتقلبات المزاجية للمجرمين، باكثر من اظهار النواحي الاجرامية والمطاردات والصراعات اللى لم تكن كثيرة فى احداث الفيلم لكنها كانت واقعية ومؤثرة.
Kidnapping Mr. Heineken مش بيقدم كتير عن الملياردير اللى عمل ثروة من الشعير، لكنه مرجع متميز للحادثة الحقيقية اللى ادت لاختطافه وطلب فدية كبيرة فى الثمانينات.