Kikoriki. Legend of the Golden Dragon : الأنيميشن الروسي قادم بقوة!
من وقت للتاني بنحتاج نتفرج على أفلام من ثقافات مختلفة، ومن خلفيات اجتماعية جديدة وحديثة، لكن للأسف الأدوات التوزيعية الخاصة بالأفلام بتركز في المقام الأول على توزيع ونشر الأفلام الهوليودية، لكن من وقت للتاني بنشوف فيلم فرنسي أو روسي أو إيطالي. والحقيقة بنكتشف أن هناك عالم كامل من الأفلام الجميلة، واحنا بنبص عليه من خُرم الباب فقط!
القصة
الفيلم بيحكي عن جزيرة كيكوريكي، واللي بيعيش فيها مجموعة من المخلوقات الغريبة والعجيبة، وفيهم مخترع مجنون بيقدر يخترع جهاز ينقل شخصية وصفات أي كائن لكائن أخر، لكن لما بيقرر أحد الشخصيات إنه يجرب الجهاز على نفسه، بيكتشف أنه بينقل الأجساد كلها مش بس الشخصيات، وده بيفتح كمية من المغامرات اللي مش بتنتهي إلا مع نهاية الفيلم.
فريق العمل
الفيلم من بطولة سيرجي ماردار و فاديم بوسحانوف و جاريك خارلاموف و ميكائيل شيرنايك أما الإخراج فا لدينيس كيرنوف والتأليف من نصيب ديميتري ياكوفينكو بالاشتراك مع دينيس كيرنوف
السيناريو والحوار
سيناريو الفيلم كان محكم وقوي، وقادر على إضحاكنا وفى نفس الوقت أقناعنا بكل الفنتازيا اللي بتدور على مدى حوالي ساعتين هي عمر الفيلم، أما الكوميديا الحقيقية فكانت في الحوار الضاحك والجميل واللي بتحتوي كل جملة فيه تقريبا على قفشه ضاحكه أو تمهيد لموقف كوميدي.
الإخراج والموسيقى والتحريك
الإخراج اعتمد على فكرة الكوميديا القائمة على المواقف الكوميدية والايفيهات الساخرة في نفس الوقت، لكن في نفس الوقت اعتمد على تكنيك تحريك مختلفة وجميلة وجذابة للعين، واهتمت الديكورات بإظهار التنوع في الألوان من خلال كوكتيل ألوان جميل كان جذاب جدا للعين. وكل الأمور دي جعلت تقييمنا للفيلم عالي ومعدل انتظارنا لكل مشهد من مشاهد الفيلم أكتر من اللي قبله.
الخلاصة
مبادرات زي مبادرة زاوية ومحاولات نوادي السينما المستقلة على الرغم من انتشارها، إلا أننا محتاجين نتفرج على أفلام غير أمريكية أكتر جمالاً وأكثر تنوعا.
علشان تبقى عارف:
تصنيف الفيلم PG يعني صالح لمشاهدة جميع أفراد الأسرة مع بعض المراقبة من الأهل للأطفال أثناء المشاهدة.
