Kin : فيلم خيال علمي عن سلاح خارق
بعض أفلام الخيال العلمي بتقدر أنها تخلق قصة كاملة بتحصل بالكامل في المستقبل، بقوانينها الخاصة وأفعال أبطالها اللي ممكن تكون مختلفة عن حياتنا الواقعية بنسبة ١٠٠٪، والحقيقة أن أفلام الخيال العلمي الأكثر متعة – من وجهة نظرنا – هي اللي بتتناول قصص من حياتنا الحالية من إضافة لمسة من الخيال. وهي دي الفئة اللي بينتمي لها فيلم Kin
فيلم Kin بيحكي عن سلاح قادم من عالم تاني أكتر تطورا عن الأرض بمراحل، بيقع في يد شاب أمريكي بيعاني من مشكلات – هو وأسرته – مع العالم اللي بيعيش فيه. مشاكل بيقدر السلاح العجيب أنه يحلها له بشكل أسطوري. لكن الحلول دايما بييجي معاها مشاكل مختلفة ومواقف مكانش متوقع أنه هايقع فيها. هي دي ملخص القصة للي مش عاوزين نحرق عليكم أحداثها أكتر من كده.
من الأمور المميزة في الفيلم القدرة على الخلط بين الجانب الخيالي أو الفانتازي في الأحداث وبين الجانب الواقعي، وده من الأمور اللي بتثبت براعة المخرجان جوناثان و جوش بيكر واللي قاموا بإخراج الفيلم مع بعض.
بالإضافة للإخراج القوي تأليف الفيلم كمان لدانيال كيسي، مع مشاركة من جوش بيكر جعلت الفيلم أكثر وحدة وقوة، وكان من الواضح تضافر عناصر القصة مع السيناريو المحكم والإخراج اللي مش عاوز يسيب أي تفصيلة تفوت منه على الرغم من إن الفيلم في النهاية فيلم خيال علمي يعني يقدر يتلاعب بقواعد المشاهدة زي ما هو عاوز علشان يخرج السيناريو في النهاية بدون أخطاء. لكن القائمين على الفيلم ما اتبعوش أي حلول (سهلة) للخروج من أي ورطة على صعيد السيناريو أو الأحداث.
مايلز ترويت في دور ايلي سونليسكي يعتبر أهم دور في الفيلم بالكامل. ومايلز ماعندوش تاريخ سينمائي كبير، بالتالي إحنا خايفين عليه يتم استغلاله في نوعية أدوار المراهقين خاصة أنه من أصل أفريقي وممكن يتم استغلاله في أدوار محدودة وما تطلعش كل اللي عنده من موهبة. بنراهن على ذكاؤه واختياراته في الفترة القادمة.
ولظبط الإيقاع التمثيلي في الفيلم تم الاستعانة باسم جاك رينور. وجاك شارك في أفلام مهمة زي The Man with the Iron Heart و Free Fire و Macbeth وغيرها من الأعمال القوية والمؤثرة، والحقيقة أنه قدم أداء تمثيلي متميز ومتوازن ومساوي لقيمة أسمه اللي بتزيد وتتألق يوم بعد يوم.
فيلم Kin بالتأكيد مش أفضل فيلم خيال علمي شوفناه في حياتنا، لكنه محاولة مجتهدة لتقديم فيلم مافيهوش تساهل في القصة والسيناريو مع كتير من المشاهد الجيدة واللي ننصحكم بمشاهدتها في الويك إند خاصة من الجمهور في سن المراهقة والشباب.
علشان تبقى عارف: تقييم الفيلم على موقع IMDB هو 5.7 من 10
