King of Thieves : فيلم عن سرقة ضخمة لمجموعة محتالين

أفلام كتير بتحكي عن السرقات الكبيرة، وفرق المحتالين اللي بتدبر وتخطط علشان تنفذ سرقات كبيرة وتقدر تهرب من العقاب أو ملاحقة الشرطة. علشان كده تقديم فيلم تاني بيحكي نفس القصة يعتبر مخاطرة. ايه اللي يقدر عليه صناع King of Thievesعلشان يقنعونا أن الفيلم مختلف عن باقي الأفلام اللي بتتناول نفس القصة؟

King of Thieves بيحكي عن مجموعة من المحتالين الكبار في السن واللي بيقرروا ينفذوا عملية سرقة محكمة في المملكة المتحدة. ومع تعقيد الخطة بيبقى أهم سؤال. هل ممكن يتم تنفيذ الخطة بالقدر ده من الصعوبة والتعقيد؟

أول حاجه علشان يختلف الفيلم عن افلام كتير في نفس الفئة هي الاستعانة بفريق عمل متميز جدا. عندنا مثلا مايكل كين في دور البطولة. والحقيقة أن مايكل واحد من أفضل الفنانين في هوليود من فترة طويلة. رغم إنه مش واخد حقه بشكل كبير. ومانقدرش ننسى بعض أدواره زي دور (ألفريد) خادم باتمان ومساعده الأول في فيلم The Dark Knight رائعة المخرج كريستوفر نولان اللي قدمها سنة 2008.

وأصلا كين شارك في بطولة فيلم going in style واللي بتتشابه قصته مع قصة فيلمنا.

كمان بيشارك في بطولة الفيلم توم كورتني و جيم برودبنت والمعروف أداؤه في أعمال زي Gangs of new York وهو واحد من اجمل أفلام المخرج مارتن سكورسيزي سنة 2002

ولو كان فريق الممثلين في الفيلم قوي ومميز. عندنا كمان مخرج من العيار الثقيل. جيمس مارش اللي قدم أعمال بقوة The Theory of Everything في 2014 والمستوحى عن قصة حياة العالم ستيفن هوكينج واللي فاز بجائزة أوسكار أفضل ممثل. غير جوائز الأكاديمية البريطانية والغولدن جلوب.

سيناريو الفيلم قوي ومترابط. وتأليف جو بينهال كان جيد وقادر يخلينا لا نشعر بالملل على مدار حوالي ساعة ونصف هي زمن الفيلم. ويقدم مغامرة مع بعض الاكشن والكوميديا اللي جعلت الفيلم أقوى وأكثر متعة في المشاهدة.

King of Thieves مش بيقدم قصة جديدة أو مختلفة. لكن تناوله للقصة المعتادة كان جيد وفيه نقاط كتير ممتعة. الأمر اللي يخلي الفيلم صالح للمشاهدة لمحبي أفلام السرقات والتخطيط والمؤامرات.