Kingsman: The Golden Circle: عودة لزمن جيمس بوند الجميل!
صناع الجزء الثاني من سلسلة أفلام (كينجسمان) عملوا أفضل شيء ممكن يعملوه.. اخدوا كل حاجه ليها علاقة بالجزء الأول وأعادوا تقديمها من جديد بشكل أكثر قوة واحترافية. وده في رأينا سبب كافي لنجاحهم!
القصة
الفيلم بيحكي عن تدمير مقر منظمة كينجسمان، وضرورة توحد أعضائها مع أعضاء جمعية جاسوسية تانية في الولايات المتحدة، للتصدي لخطة الشريرة جوليان مور أو (بوبي) واللي بتحاول تسيطر على العالم.
فريق العمل
الفيلم من تاليف ماثيو فون بالتعاون مع مارك فيلر، أيضا فون تولى مسئولية أخراج الفيلم، وأسند البطولة لـ تارون إيجرتون و جوليان مور و تشانينج تاتوم و هالي بيري و كولين فيرث
الأداء التمثيلي
المميز في الفيلم أن أبطاله كانوا على وعي ودراية كبيرة بالجزء الأول من الأحداث، بالتالي قدروا يقدموا لنا أداء متناسب مع محبي السلسلة واللي كانوا بانتظار الجزء الثاني على أحر من الجمر. لكن جوليان مور على سبيل المثال وعلى الرغم من أسمها الضخم في عالم التمثيل الا أن أداؤها في الفيلم كان ضعيف وفشلت في كتير من التحديثات، وحسينا أن أسمها على أفيش الفيلم تمت كتابته لزيادة القيمة السوقية للفيلم فقط. على الرغم من مساحة دورها الكبير كشريرة الفيلم بالمقام الأول.
السيناريو والحوار والأخراج
أخراج الفيلم كان محترف تماما في اخراج مشاهد الأكشن والاشتباكات، وتم استعمال زوايا الكاميرا من جهات مختلفة علشان يقدم لنا في النهاية مجموعة من المشاهد القوية والمميزة واللي أكيد هاتعجب كل محبي أفلام الأكشن بشكل عام، ومتابعي السلسلة بشكل خاص. لكن اخراج الفيلم كان واضح جدا تأثره بعالم أفلام جيمس بوند، وخصوصا الفترة الأولى من سلسلة الأفلام، وده كان شيء جيد في حد ذاته لانه فكرنا فعلا بفترة جيدة من فترات صناعة أفلام الجاسوسية.
الديكورات والموسيقى والأزياء
ديكورات الفيلم والأزياء قدرت تنقلنا زمنيا للفترة اللي بيحكي عنها الفيلم باقتدار، وكنا متوقعين من الموسيقى نفس الأبهار لكن للأسف كانت قوية وكل حاجه لكن مش بالقوة اللي كنا متوقعينها لفيلم زي ده. وأبسط مقارنة بينها وبين الموسيقى المميزة لافلام جيمس بوند مثلا هاتكون في صالح سلسلسة بوند بلا نقاش.
الخلاصة
لو كنت من محبي سلسلة أفلام جيمس بوند القديمة، أو من محبي سلسلة (كينجسمان) الحالية، الفيلم ده أكيد هايكون أَضافة ممتازة وها يخلق عندكم حالة ابهار ومتعة بصرية كبيرة.
علشان تبقى عارف:
تم تقديم الجزء الأول من السلسلة سنة 2014 بعنوان Kingsman: The Secret Service
