Kingsman: The Secret Service : فيلم جاسوسية مختلف
الحقيقة اننا من محبى افلام الجاسوسية والمنظمات اللى ماحدش يعرف عنها حاجه، الجو العام للسرية والاكشن المختلط بالعملاء اللى مش بيغلطوا واللى بينفذوا عمليات سرية فى كل مكان فى العالم بدون ما اى حد يعرف عنها اى شىء، العالم ده كله بيثير جوانا حالة من الحماسة مش بنحس بيها غير مع كل فيلم جديد من افلام الجاسوسية، وده اللى حصل لنا مع فيلم kingsman
الفيلم من تأليف و اخراج ماثيو فون ، وبيحكي عن احد العمليات الاستخباراتية اللى بتقوم بها منظمة شديدة السرية، من خلال تجنيد ابن احد العملاء السابقين بها، وهو مراهق جامح مافيش اى حاجه بتوقفه عن تحقيق اهدافه، بيتم تجنيده لصالح الايقاع بعالم مجنون بيخطط لتهديد العالم بالكامل!
بطولة الفيلم كانت من نصيب كولين فيرث اللى ادي اكثر من 80% من مشاهد الاكشن بنفسه بدون الاستعانة بدوبلير و مارك سترونج وصامويل جاكسون اللى قام بدور متميز ومختلف ويضاف لسلسلة الادوار الجديدة واللى بيقوم بيها الفنان المتمكن من اختياراته واسلوبه الخاص فى الأداء.
الديكورات والموسيقي التصويرية لعبت دور مهم جدا فى الفيلم، وتناغمت مع المؤثرات الخاصة اللى ظهرت بداية من طريقة كتابة الاسماء على تترات بداية الفيلم وحتي اخر لحظه من لحظات الفيلم، بالاضافة للموسيقي اللى كانت ارستقراطية وفخمة بما يتناسب مع فيلم جاسوسية ولا يتناسب مع فيلم اكشن، الامر اللى اعاد لنا ذكريات قديمه مع افلام جيمس بوند واللى كانت موسيقاها التصويرية مختلفة عن المستوي الفنى للافلام نفسها.
الفيلم نفسه بيحمل العديد من الاشارات والايحاءات المهداه لافلام جيمس بوند، منها على سبيل المثال From Russia with love واللى يعتبر من اكثر افلام بوند تميزا.
The Secret Service فيلم جاسوسية وحركة وتشويق، وبنرشحه للمشاهدة كفيلم حركه خفيف قادر على تذكيرنا بعوالم جيمس بوند ومنظمات التجسس السرية
