Knives Out : من الجاني؟!

تيمة “من الجاني” أو “من فعلها” واحدة من أقدم التيمات اللي اعتمدت عليها سلسلة كبيرة من الأفلام والروايات على حد سواء. وطبعا لا يمكن نتكلم عن التيمة دي بدون ما نتكلم عن أشهر كاتبة في المجال ده وهي أجاثا كريستي واللي قدرت تقدم مجموعة من الألغاز الشهيرة والمشوقة واللي اتحول قطاع كبير منها لأفلام.

في فيلم Knives Out بنشوف لعب على نفس التيمة. كاتب مشهور وعنده ثروة ضخمة من الأعمال الفنية بيتم اكتشاف جثته مقتولا. وفي البداية بيظن أهله أنها حادثة انتحار لحد ما بيتم استدعاء محقق شهير متخصص في القضايا الغامضة (قام بالدور دانيال كريج) واللي بيبدأ يستجوب واحد واحد من أعضاء الأسرة. علشان نكتشف أن كل واحد منهم له مصلحة في جريمة القتل.

زي ما قولنا مافيش جديد على صعيد الحكبة أو القصة. لكن الجديد والجيد في الفيلم هو فريق الممثلين اللي تم اختيارهم بعناية علشان يقدموا لنا في النهاية قصة مترابطة وشخصيات مقنعة. الكلام ده ينطبق على كريس إيفانز و آنا دي أرماس و مايكل شانون وباقي الممثلين. لكن للأسف لا ينطبق على دانيل كريج على الرغم من مساحة الدور الكبيرة وترقبنا الكبير للشخصية.

دانيل كريج فشل في إقناعنا بشخصية المحقق. وحسيناه طوال الوقت بيلعب دوره من منطلق جيمس بوند بس بشكل عقلي مش جسدي المرة دي. وده كان سبب جزء من ضيقتنا من الفيلم.

لكن من الحاجات اللي أعجبتنا في الفيلم أسلوب التصوير والتيمة اللي ظهرت عليها أغلب المشاهد بشكل حسسنا أن المخرج والمؤلف ريان جونسون عنده إتجاه إخراجي مميز ومختلف وعاوز يسيب بصمته على كل مشهد.

Knives Out فيلم جيد بيجمع مجموعة من النجوم الكبار مع قصة نادرا ما فشلت في جذب انتباه المشاهدين طوال الوقت.