Krampus : رعب طفولى بنكهة الكريسماس!
على الرغم من التريلر والجو المرعب اللى بيوحي بيه وبيحاول يعكسه فى كل ثانية من ثواني الاعلان التشويقي للفيلم، وعلى الرغم من تلهفنا على فيلم رعب بيعكس اجواء (نقيض بابا نويل) وشعورنا ان الفيلم بالفعل ممكن نخرج منه بشىء اكثر قوة وتميزاً عن باقى افلام الرعب والتشويق، الا ان للاسف النتيجة النهائية كانت مخيبة للامال.. لان حتي الفيلم لم يقدم المستوي التقليدي البسيط للرعب العادي اللى متعودين عليه!
من تأليف وأخراج مايكل دورتي، ومن بطولة ادم سكوت و توني كوليت و كونشاتا فيريل و ديفيد كيكنير بنشوف قصة اجتماع عائلي بمناسبة الكريسماس، مع اجواء دافئة وحميمية ولا يفسدها سوي شقاوة الأولاد الصغيرين، وهى نفس الأجواء اللى شوفناها فى فيلم زي Home Alone خاصة بدايات الجزء الأول منه.
الأمور بتتطور لما بتحصل خناقه بين الأولاد الصغار، وواحد فيهم بيهين فكرة (بابا نويل) والأمل فى الغد الموجود فى هذه الفكرة، الامر اللى بيستدعي شيطان رجيم اسمه (كرامبوس) بيهدد الأسرتين المجتمعتين وبيسحب الفيلم لمساحة ومنطقة من الغموض والرعب والمواجهة بين العائلة وبين (كرامبوس) الشرير واتباعه الغرباء.
للأسف ياريت الفيلم لم يدخل منطقة الرعب، لانه فشل فى تقديم الرعب الكوميدي المعتمد على الايفيهات او حتي المشاهد المرعبة واللى ليها طابع كوميدي فى نفس الوقت، وايضا الفيلم فشل فى تقديم الرعب الحقيقي الخاص بأفلام الرعب العادية، لان مستوي الفيلم لم يصل لمستويات الرعب دي، ولحرص القائمين على الفيلم على الخروج به فى منطقة التصنيف العائلية بعيدا عن تصنيفات الكبار فقط لحصد نسبة مشاهدة اعلى خاصة ان الفيلم بيتم عرضه فى موسم الكريسماس.
الجرافيكس والمؤثرات الخاصة كانت قوية ومتميزة، خاصة المشاهد اللى بيتم المزج فيها بين الواقع والحقيقة وبين المؤثرات الخاصة بطريقة متميزة وجديدة وحسستنا بالجهد المبذول فى اخراج المشاهد دي بشكل قوي وجديد، لكن شىء زي الموسيقي التصويرية مثلا كانت ضعيفة وعلى غير المستوي وغير مؤهلة انها تكون الموسيقي التصويرية الخاصة بفيلم رعب المفروض انه مرعب.
الأداء التمثيلي بقى اللى كان سىء جدا للاسف، ومع اخطاء قاتلة للسيناريو جعلت احد المشاهد بيظهر فيه (كرامبس) وهو بيخطف احد الاطفال، وفى المشهد التاني بيقف ابوه يتكلم مع والدته عن ندمه على اختطاف ابنه بدون اي رد فعل حقيقيى على ارض الواقع! ياللهول!
(كرامبس) فيلم بيتأرجح بين الرعب والتشويق والاثارة، ننصحكم به لو كنتم من محبى مشاهدة الافلام فى المواسم بتاعتها زي الكريسماس وغيرها.
