Kursk : الأفلام الواقعية مش دايما مُبهجة
البعض ممكن يشوفها ميزة والبعض التاني ممكن يشوفها عيب. الأفلام الواقعية مش دايما بتيجي مع نهايات سعيدة. وعلى الرغم من أن بعض المشاهدين ممكن يشوفوا ده كئيب لكن من ناحيه تانيه بعض الأفلام بتؤرخ لحوادث معينة وتمنع الناس من نسيانها وهو ده اللي حصل مع فيلم Kursk
فيلم Kursk بيتناول واقعة حقيقية لكارثة بحرية حصلت لغواصة نووية روسية. تعرضت لحادث في البحر وحوصرت في منطقة صعبة أثناء مناورة بأسلحة غير حقيقية – على الأقل ده التفسير الرسمي للحادث-
ومع الوقت بتتحط الحكومة الروسية في مواجهة صعبة بين الرأي العام وأهالي البحارة اللي عاوزين يتم انقاذ أهلهم. وبين خوف الحكومة على الأسرار النووية في الغواصة وعدم رغبتها في الاستعانة بمساعدة الدول التانيه.
الأداء التمثيلي لأبطال الفيلم كولين فيرث و ماكس فون سيدو و ماتياس شوينارتس وغيرهم من أبطال الفيلم كان قوي ومميز. لكن ضايقنا في نفس الوقت النمطية الشديدة في تقديم الشخصيات. يعني كل شخصية بيتم تقديمها في القالب المحفوظ بتاعها. وكأن كل الروس مجموعة من الشخصيات العصبية المتصلبة زي ما بنشوفهم في الأفلام الأمريكية باستمرار.
إخراج توماس فينتربيرج للفيلم كان جيد. وقدر يوظف كل واحد من الممثلين في مكانه الصحيح. أما الإبداع الأكبر فكان لديكورات الغواصة اللي تم تقديمها بشكل ممتاز. ولو كان تصميم الديكورات أقل من اللي شوفناه على الشاشة الفيلم كان هايفشل باقتدار لأن جزء مهم من الفيلم هو توحد المشاهدين مع الحدث وشعورهم بكل مشهد فيه كإنه حقيقي.
لو بتحب الأفلام اللي لها نهاية سعيدة وكلها حب وتفاؤل يبقى Kursk مش الفيلم المناسب لك. أما لو بتحبوا الأفلام المقتبسة عن قصة حقيقية أو كنتم من اللي تابعتم القصة الحقيقية الأصلية للغواصة المنكوبة. أكيد Kursk هايكون الفيلم المناسب لكم.
