Last Christmas : هل ممكن حبيبك يغير حياتك بالكامل؟
ساعات بنزهق من ضجيج الحياة وبنعوز نتفرج على قصة رومانسية جميلة تخطفنا من كل حاجه حوالينا. فيلم Last Christmas قدر يحقق المهمة دي بنجاح. لكن طبعا بدون الوقوع في بعض المشاكل. تعالوا نعرف أكتر عنه.
Last Christmas بيحكي عن شابة مهاجرة بتعيش حياة متهورة و (خرقاء) – قامت بدورها اميليا كلارك صاحبة الأداء الرائع في مسلسل Game Of Thrones الشهير –
لكن حياة كيت بتختلف تماما لما بتتعرف على الشاب الوسيم توم (قام بالدور هنري جولدينج) وبتقع في حبه. وبيبدأ يغير حياتها بالكامل ويفتح عنيها على حاجات كتير مكانتش تتخيل أنها موجودة في العالم!
الفيلم مش مجرد قصة رومانسية بس. لكن الكاتبة إيما تومسون – واللي شاركت في البطولة كمان- نجحت في أنها تضيف شوية بصمات سياسية واجتماعية عن حياة المهاجرين والمشاكل اللي بتواجههم مع شوية إشارات لخروج بريطانيا عن الإتحاد الأوروبي وغيرها من المشاكل السياسية والإنسانية.
وعلى الرغم من نجاح الفيلم في الموازنة بين السياسة والرومانسية لكن حسينا في بعض خيوط السيناريو بالتطويل الشديد وعدم وجود هدف واضح من بعض المشاهد أو حتى بعض الخيوط الدرامية اللي لو كانت أتشالت بالكامل مكانتش هتأثر على السياق الدرامي للأحداث وده كان من الأمور المحبطة لنا.
من ناحية تانية بنشوف اميليا كلارك اللي قدرت تخرج من عباءة (أم التنانين) وهو الدور اللي قامت بيه في المسلسل الشهير Game of Thrones. ويمكن دي كانت من المرات الأولى اللي نسمع فيها ضحكتها العفوية في دور رومانسي جميل.
Last Christmas فيلم رومانسي كوميدي سياسي متوازن مع مفاجئة بتغير تسلسل الأحداث.. تقدروا تستمتعوا بيه وتساعدونا على الإجابة على السؤال: هل الحب قادر على تغيير حياة الناس بنسبة ١٠٠٪؟
