Leatherface: الرعب في الصغر كالنقش على الحجر!
لما بنشوف أشخاص بيسلكوا سلوك اجرامي معقد أو ضد المجتمع والقانون، بنفكر في الظروف اللي خليتهم يعملوا كده. فيلم Leatherface بيحكي عن الظروف اللي ممكن تخلق قاتل بدم بارد وبلا رحمة.
القصة
قصة الفيلم بتدور زمنيا قبل فيلم The Texas Chain Saw Massacre لكننا بننصح اللي ما شافش الفيلم الأول يشوفه قبل ما يتفرج على فيلمنا علشان يقدر يفهم تتابع الأحداث بالشكل الصحيح والمناسب ويزود متعة المشاهدة.
والفيلم بيحكي عن مجموعة من المراهقين بيخطفوا ممرضة شابة وبتتوالى الأحداث اللي بتكتم الأنفاس من فرط الرعب والدموية.
فريق العمل
الفيلم من اخراج جولين موري وتأليف سيث شيروود وبطولة ستيفن دورف و ليلي تايلور و نيكول اندروز و سام سترايك و جوليان جوستوف و سام كولمان
الأداء التمثيلي
الأداء التمثيلي لكل الأبطال كان أكتر من رائع. وقدر كل واحد منهم يقدم لنا دوره على أكمل ما يكون، خاصة لما بيحصل تكامل بين السيناريو المثير والأخراج اللي قدر يضع المشاهد في منتصف الأحداث ويخليه يسأل السؤال المرعب: لو أنا في نفس الموقف كنت هاعمل ايه؟!
السيناريو والحوار والأخراج
زي ما قولنا سيناريو الفيلم نجح في خلق حالة من التفاعل والتبادل بين المشاهدين وأبطال الفيلم، ومن هنا بتبدأ عملية الرعب تكتسب بعد شخصي عند المشاهد، وده اللي بيخلي الفيلم أكتر متعة. لكن بنعيب على الأخراج انه التزم بتقاليد أفلام الرعب اللي عفى عليها الزمن أكتر من اللازم و(استسهل) في تقديم الأحداث ولم يحاول يضع بصمته الشخصية على الأحداث وطريقة سيريها أبدا.
الديكورات والموسيقى والأزياء
ديكورات الفيلم جيدة وقدرت تنقلنا زمنيا وجغرافيا لوقت ومكان الأحداث، كمان حركة الكاميرا السريعة والمتلاحقة كانت أكتر من رائعة، لكن الموسيقى في رأينا كانت محتاجه تكون أفضل وأكثر تركيزا وهدوئا في اللحظات المرعبة. علشان ساعات الهدوء بيكون أكثر رعبا من الموسيقى الصاخبة!
الخلاصة
Leatherface فيلم هايعجب كل محبي أفلام الرعب وخاصة محبي The Texas Chain Saw Massacre
علشان تبقى عارف:
تقييم الفيلم على IMDB 5 من 10
