Life : الرعب القادم من المريخ!
الناس في حبها لأفلام الرعب مذاهب. البعض بيحب أفلام الرعب المبنية على أفكار حقيقية ممكن تحصل في حياتنا اليومية. والبعض بيفضل أفلام الرعب اللي بتحصل في المستقبل البعيد أو في أماكن مستحيل نروح لها. وفيلم Life بيلعب على الفكرة التانية. الرعب القادم من المريخ للأرض.
القصة
فيلم Life بيحكي عن مجموعة من العلماء المتخصصين في عدة مجالات، بيسافروا في الفضاء علشان يلتقطوا مكوك عائد من المريخ ومعاه عدد من العينات المختلفة اللي تم جمعها من الكوكب الأحمر. لكن المهمة الروتينية بتتحول لكارثة حقيقية لما بيكتشف فريق العمل أن من ضمن العينات المسحوبة من المريخ عينة لكائن حي سريع النمو بشكل لا يصدق.
قصة الفيلم بتتطور سريعا ما بين محاولة اكتشاف الكائن الحي، ثم محاولة احتواء نموه، ثم محاولة قتله لما بيكتشفوا نواياه العدائية، وأن وصوله للأرض ممكن يتسبب في كارثة لا يعلم مداها الا الله!
فريق العمل
الفيلم من بطولة جيك جيلنهال و رايان رينولدز و ريبيكا فيرجسون و هيرويوكي سانادا ومن إخراج دانيال اسبينوزا ومن تأليف ريت ريز، و بول ويرنيك. وللعلم فأن الفريق ده هو فريق المؤلفين لفيلم Deadpool واللي قام ببطولته رايان رينولدز برضو!
الإخراج
إخراج الفيلم كان مميز، وكان معتمد على الموازنة بين جرعة الرعب في الفيلم وبين جرعة الخيال العلمي، علشان كل محب لنوع معين من النوعيات دي يجد في الفيلم الجرعة المناسبة اللي تعجبه. وفى الواقع احنا احترنا شوية ما بين تصنيف الفيلم كفيلم رعب أو تصنيفه كفيلم خيال علمي، لكن في النهاية قررنا تصنيفه كفيلم رعب علمي لو كان فيه تصنيف بالاسم ده!
المؤثرات والديكورات
لازم نقول إن الفيلم ده لم يكن ليكون بالقوة والتأثير ده، لولا المؤثرات الخاصة واللي تم استعمالها بحذر علشان تؤدي الدور المطلوب منها بالضبط بدون زيادة أو نقصان. لأن المؤثرات الخاصة لو زادت المشاهدين ممكن يحسوا انهم في فيلم كارتون! وفى نفس الوقت مستحيل نتخيل فيلم خيال علمي بدون مؤثرات خاصة!
كمان يحسب للفيلم التزامه بالقوانين والنواحي العلمية قدر الإمكان فيما يتعلق بقوانين السفر في الفضاء، وهي نقاط صغيرة لكن الالتفات لها بيعرفنا مدي اهتمام الإخراج بالتفاصيل مهما كانت صغيرة.
الخلاصة
فيلم Life فيلم رعب فضائي، يعتبر مميز لمحبي الخيال العلمي أو محبي أفلام الرعب، وطبعا فيلم رائع لمحبي الخيال العلمي والرعب مع بعض!
علشان تبقى عارف:
(ريان رينولدز)، (بول ويرنك)، و(ريت ريز) تعاونوا سويًا من قبل في فيلم (Deadpool) عام 2016.
