Like a Boss : سلمى حايك طلعت نصابة!
في بداية مشاهدتنا فيلم Like a Boss كنا خايفين يكون واحد من الأفلام الماشية في موضة الفيمنست. لكن الحقيقة الفيلم قدر يقدم جرعة كوميديا لطيفة مع قصة نقدر نتابعها بدون مجهود كبير. وهو ده المطلوب منه بدون زيادة ولا نقص.
Like a Boss بيحكي عن سيدتين بيدخلوا مجال الأعمال وبيحلموا بتكوين بيزنس خاص بهم عبارة عن شركة في مجال التجميل. وعلى الرغم من الاختلاف الكبير بينهم من حيث الشخصيات بياخدوا أول خطوات لهم في المجال. لحد ما بيقعوا تحت سيطرة ونصب مليونيرة كبيرة (ٍسلمى حايك) بتستغل جهلهم بمجال البيزنس.
زي ما قولنا الفيلم خفيف وأحداثه سهلة الاستنتاج لكنه في نفس الوقت ممتع وكوميدي. وده ناتج من الكيمياء الجميلة بين بطلاته روز بيرن و تيفاني هاديش وسلمى حايك واللي حولوا الفيلم لمسخرة حقيقية في كل مشهد تقريبا بشكل يخلي المشاهد لا يشعر بالملل ولو لثانية واحدة.
المخرج ميجيل أرتيتا أستغل إسم سلمى حايك علشان يعمل تسويق جيد جدا للفيلم. والحقيقة أن حايك بتثبت كل يوم أن السن مجرد رقم. وأنها قادرة تمثل وتلعب أي دور مطلوب منها سواء كان عميق أو خفيف زي دورها في Like a Boss بمنتهى السهولة والأقناع في نفس الوقت.
موسيقى الفيلم وديكوراته كانوا كويسين. لكن للصراحة Like a Boss مش من الأفلام اللي تركز فيها على الموسيقى والديكور بقدر التركيز على القصة والقفشات الكوميدية اللي فيها. ونقدر نقول لكم ان الفيلم فيه جرعة كوميديا جميلة ومنوعة جدا.
باختصار.. لو عاوزين تنفضوا من كل حاجه وتقضوا حوالي ساعتين كوميديا وايفيهات. ننصحكم بمشاهدة Like a Boss
