Lincoln: الفيلم المناسب فى الوقت غير المناسب
بعد مشاهدتنا لفيلم “Lincoln” حسينا أننا شوفنا الفيلم المناسب لكن فى الوقت والمكان غير المناسبين على الإطلاق.
الفيلم بـ يغوص فى التاريخ الأمريكى فى واحدة من أكثر فتراته تعقيدًا ودقة، رئيس بـ يحاول تمرير تعديل دستورى بإلغاء تجارة العبيد، وولايات الجنوب منفصلة عن الشمال، والحرب الأهلية بين الطرفين قوية ودامية إلى أقصى حد، جو تاريخى أمريكى صرف، لازم يكون عندك خلفية تاريخية محترمة قبل ما تقرر أنك تأخذ مكانك فى قاعة العرض وتشوف الفيلم.
فى رأينا الشخصى: المخرج ستيفن سبيلبرج هو أعظم مخرج سينمائى فى التاريخ! وبلا منازع، بالتالى شهادتنا عنه مجروحة. لكننا كمان شايفين أنه كان ممكن يعمل أحسن من كده بخصوص “لينكولن”، خاصة أن المشاهد الافتتاحية للحرب الأمريكية الدامية فكرتنا بالمشاهد الافتتاحية لفيلم Saving private Ryan اللى قدمه نفس المخرج.
شوفنا قريبًا فيلم Abraham Lincoln: Vampire Hunter وكان بـ يحكى عن رؤية فانتازية للرئيس الأمريكى كصياد لمصاصى الدماء، مع إسقاط سياسى لا شك فيه. لكن النهارده بـ نشوف تناول جديد وأكثر دقة وتاريخية لحياة إبراهام لينكولن من خلال أداء احترافى عبقرى للفنان دانيل داى لويس فى دور لينكولن، مع لمسات موسيقية هادئة، والأروع: ديكور نقلنا للحياة فى الحقبة التاريخية اللى بـ يتناولها الفيلم بالضبط، من غير غلطة واحدة أو أمر واحد خارج إطاره الصحيح.
باختصار شديد: “لينكولن” فيلم رائع، ظلمه توقيت عرضه فى مصر، وبعض التطويل فى الحوارات بين الأبطال، وقلة ثقافة المشاهد المصرى، والأمر فى النهاية كان شبيه بأننا نخلى سائح أمريكى أول مرة يزور مصر يتفرج على فيلم “أيام السادات” ونطالبه أنه ينبهر به.
