Lion: تعرف إيه عن الأطفال المفقوده فى الهند؟!
على الرغم من قدرة الأفلام الهندية انها تقدم خليط مابين الأكشن والرومانسية والرعب والدراما، إلا أن فيلم اليوم كان مركز على الجانب الإنساني والدرامي بالمقام الأول.. والنتيجة فى الحقيقة كانت مبهرة.
Lion بيحكي عن قصة طفل صغير عايش فى أحد قرى الهند. الأسرة عايشه تحت خط الفقر حرفياً، والطفل الصغير بيعمل فى حمل الفحم والحجارة وإعادة بيعها.
وفى يوم من الأيام بيتوه بطلنا (ساروه) من أخوه وبيحمله القطار لمنطقة تانية مش عارفها، ومش عارف تفاصيل بيته علشان يرجع له. ومن هنا بتبدأ مأساة (ساروه) لما بتتبناه عائلة من أستراليا وبيعيش معاهم لأكثر من 20 سنه!
مش عاوزين نحرق الأحداث أكتر من كده، لكن عاوزين نسيبكم لخيالكم عن إزاي يقدر طفل تاه عن أهله من فترة طويلة إنه يقدر يرجع لهم تاني؟ هى دى القصة اللى بيناقشها الفيلم خلال أحداثه.
على الرغم من كون القصة غير مشوقة بالمقام الأول، لكن السيناريو قدر يعمل من الفسيخ شربات، وقدر يحول القصة اللى ممكن تصيبنا بالملل لسلسلة من الأحداث المشوقة والمشجعة على المتابعة من البداية للنهاية.
على الرغم من قوة الموسيقى التصويرية لكن حسينا إن كان ممكن تكون أقوى من كده، خاصة إننا بنتكلم عن فيلم بنكهه هندية ومن المعروف اهتمام الهنود بالموسيقى التصويرية لأفلامهم، لكن Lion موسيقته كان ممكن تكون أقوى وأكثر تركيزا.
الأداء التمثيلي للأبطال كان متميز جدا.. الفيلم من بطولة ديف باتل و رونى مارا و ساشين جواب و إيميلي كوكويريل واحنا مش ناسيين ديف باتل اللى قدم للسينما أفلام قوية زي
The Man Who Knew Infinity واللى كان بيحكي عن عالم رياضيات هندي بيحاول يثبت نفسه أمام أقرانه الإنجليز فى فترة من توتر العلاقات بين البلدين، أو فيلم Slumdog Millionaire اللى كان بيحكي عن (جمال سالم) الشاب الهندي اللى بيفوز بمسابقة من سيربح المليون.
أخر حاجه عاوزين نتكلم عنها هى الإخرج المتميز لجارث ديفيث، وحركة الكاميرا اللى قدرت تقدم لنا مشاهد أقل ما يقال عنها إنها كانت لوحات فنية، خاصة فى المشاهد الأولى من الفيلم.
فيلم Lion فيلم إنساني متميز.. بلاش تسيبوا قاعة السينما بعد نهاية الفيلم لأنه بيستعرض القصة الحقيقية لأبطاله.. ودي حاجه لا يمكن تفويتها!
علشان تبقى عارف:
- صرّح المنتج (برافيش ساني)، أن أربعة آلاف صبيًا قد تقدموا لتجارب أداء شخصية الشاب (سارو بريرلي).
- يعتبر الممثل (ديف باتل) أن نص الفيلم هو أفضل نص سينمائي قرأه على الإطلاق.
- النجمان (هيو جاكمان) و(كولين فيرث) كانا مرشحان لأداء أدوار في الفيلم.
