Logan Lucky: من فات قديمه تاه!
مين يقدر ينسى سلسلة أفلام Ocean اللي حققت نجاح كبير بسبب قدرتها على تقديم أفكار وحبكات مختلفة للجمهور؟ مخرج الأفلام الأقوى في السلسلة دي بيقدم لنا اليوم فيلم بيدور –تقريبا- حول نفس العالم. هل ها يقدر يحقق النجاح المرجو منه؟
القصة
الفيلم بيحكي عن الشقيقين جيمي وسلايد لوجان واللي بيحاولوا يقوموا بسرقة ضخمة استغلالا لسباق ناسكار المشهور بالسيارات السريعة جدا، لكن بيتعرضوا لسلسلة من الأحداث اللي بتعوق تنفيذهم للمخطط بتاعهم. هل هايقدروا يحققوا سرقتهم في النهاية أم لا؟ هو ده اللي بنعرفه من خلال أحداث الفيلم.
فريق العمل
الفيلم من اخراج ستيفن سوديربرج وهو مخرج تقيل لأفلام زي Solaris و Ocean’s Twelve و Ocean’s 13 وفيلم (تشي) بأجزائه واللي تناولت قصة حياة المناضل الكوبي ارنستو جيفارا، أما سيناريو الفيلم فكان من نصيب ريبيكا بلنت والبطولة كانت لـ دانيال كريج و كاثرين ووترستون و تشانينج تاتوم و سيث ماكفرلين.
الأداء التمثيلي
الممثلين وقع عليهم عبء كبير في توصيل أهداف الفيلم سواء على صعيد الكوميديا أو بعض مشاهد الأكشن وغيرها من المشاهد اللي تطلبت منهم مجهود تمثيلي كبير. مجهود يمكن يكون مش واضح للمشاهدين بشكل مباشر لكن نتيجته كانت واضحة من خلال تفاعل المشاهدين مع أحداث الفيلم، ونخص هنا بالذكر دانيل كريج واللي قدم –كعادته- دور مميز وقادر على جذب عيوننا له في كل مشهد قام به.
السيناريو والحوار والأخراج
على الرغم من المحاولات المستميتة من سيناريو الفيلم انه يبعدنا عن الشعور بالملل لكننا حسينا بالملل في النصف الأول من الأحداث، ثم بدأنا بعد كده نشعر بالحماس والرغبة في متابعة أحداث الفيلم واللي تبين لنا أن السيناريو كان بيدخر لنا الجزء الأكبر من التشويق للنصف الثاني من الأحداث.
حوار الفيلم كان عليه عبء كبير خاصة في الجزء الكوميدي لكنه قدر يقوم باللي عليه وقدم لنا في النهاية حوار حيوي وجذاب وغير ممل وده شيء يحسب للقائمين على الفيلم. وبشكل عام نقدر نقوم أن المخرج كان عارف بالظبط ايه المطلوب منه وقدمه لنا: فيلم خفيف مناسب للمشاهدة في موسم الصيف.
الديكورات والموسيقى والأزياء
ديكورات الفيلم كانت مميزة وقدرت تنقلنا بصريا لعالم الفيلم، على العكس من الموسيقى والأزياء اللي كانوا على درجة كبيرة من الضعف وحسينا أنهم كانوا المفروض يكونوا أفضل من كده. لكن في النهاية طبيعة الجمهور اللي بيتفرج على الفيلم مش هاتهتم بالأزياء والموسيقى بقدر اهتمامها بباقي عناصر الفيلم.
الخلاصة
لو كنت من محبي خلطة الأكشن والكوميديا والمواقف الغريبة اللي بتحصل فجأة زي سلسلة أفلام Ocean ننصحك تتابع Logan Lucky
علشان تبقى عارف:
كانت النجمة (كاثرين هايجل) مُرشحة للفيلم، ولكنها انسحبت بسبب حملها
