Long Shot : اللي يلعب على كل الأحبال.. يخسر
أفلام قليلة اللي بتجمع بين السياسة والكوميديا والرومانسية مع بعض في فيلم واحد. Long Shotقدر يحقق المعادلة دي. لكن عدم تركيزه على أي خيط رئيسي ومحاولة اللعب على كل الحبال أثر بشكل سلبي على الفيلم.
Long Shot بيحكي عن تشارلز ثيرون اللي بتترشح لمنصب رئيسة الولايات المتحدة الأمريكية. في نفس الوقت اللي بتعيد علاقتها بصديق قديم (سيث روجان) واللي كان بيحبها في صمت زمان. ومع تطور الوقت بيعمل معاها على كتابة خطاباتها السياسية. وبتتطور العلاقة الرومانسية بينهم.
الأداء التمثيلي لتشارلز ثيرون و سيث روجان كان رائع. وكان واضح الكيمياء العظيمة بين الأتنين واللي جعلتنا نغوص في الشخصيات والأحداث بشكل كامل. كمان عجبنا رسم وكتابة الشخصيتين من دان الإسترليني و ليز هانا مؤلفي الفيلم واللي قدروا يخلطوا الكوميديا بالسياسة بالرومانسية في مزيج جيد جدا.
أمال أيه اللي ماعجبناش؟ ماعجبناش أن الفيلم كان فاقد للهوية. مش عارف يحدد هل هو فيلم كوميدي مع خط رومانسي أم فيلم رومانسي مع شوية كوميديا. ولا فيلم سياسي دخل فيه الكوميديا والرومانسية. الفشل ده في تحديد اتجاه ثابت وواضح للفيلم خلانا لا نصل للمنتهى في أي جزء من أجزاء الفيلم. لا ضحكنا للنهاية ولا حسينا أننا أمام عمل رومانسي رائع أو سياسي صميم.
Long Shot فيلم ينفع للمشاهدة في الويك اند بدون توقعات مسبقة من جمهور عاوز يشوف توليفة حلوة بين الكوميديا على الرومانسية مع شوية سياسة ونكت على دونالد ترامب.
