Look Away : تعمل ايه لو صورتك في المراية اتكلمت معاك؟!
ساعات بتيجي علينا لحظة بنتمنى فيها أن يظهر شخص يتولى هو أمور حياتنا ويتولى التعامل مع كل الناس اللي ضايقتنا ويعلمهم الدرس بالطريقة الصعبة اللي احنا مش عارفين نعملها في الوقت العادي.
هو ده اللي حصل مع ماريا (قامت بدورها إنديا إيسلي) اللي بتتعرض للتنمر في المدرسة الثانوية. ثم بتكتشف أن انعكاسها في المرأة له شخصية مستقلة! ومش بس قادرة على اتخاذ قراراتها المنفصلة، لكن كمان قادرة تخلي حياتها أفضل من خلال الأنتقام من الناس اللي بتتنمر بيها.
ومن هنا بيحصل اتفاق بين الشخصيتين لتبادل الأدوار. لكن هل القرار ده هو القرار الصح اللي أخدته (ماريا)؟
فكرة الخوف من انعكاس الانسان في المرأة مش فكرة جديدة. بل واحدة من الأفكار والتيمات اللي صاحبت البشر من بداية اختراع الاسطح العاكسة عموما. وتم تقديم الفكرة في بعض الأفلام والمسلسلات اللي بتتناول الظواهر الغامضة والغريبة.
الأداء التمثيلي لـ إنديا إيسلي كان قوي ومميز. وقدرت تقنعنا بالقيام بالدورين ماريا وإيرما (لاحظوا إزاي إسم إيرما هو كمان انعكاس لإسم ماريا). وقدرت من خلال تعبيرات وجهها وجسدها انها تحسسنا فعلا أن فيه شخصيتين منفصلتين تماما عن بعض من حيث الدوافع والرغبات وحتى السلوكيات اليومية.
على الرغم من أعتماد أفلام الرعب في المقام الأول على المؤثرات الخاصة والخدع السينمائية لكن المخرج والمؤلف عساف برنستاين ماقدرش يحسن استغلال المؤثرات الخاصة في الفيلم. وظهرت بعض المشاهد مع بعض الضعف في التنفيذ وده خلى بعض المشاهدين يفقدوا القدرة على الشعور والتعاطف في بعض المشاهد
الموسيقى التصويرية المصاحبة للاحداث كانت جيدة وقوية وساعدت على شعورنا ودخولنا مع ابطال الفيلم في الأحداث بسرعة وسهولة.
Look Away مش فيلم رعب قوي. لكن الفكرة المختلفة والأداء التمثيلي عوامل بتخليه فيلم هايعجب كل محبي أفلام الرعب خاصة اللي بيخافوا من المراية!
