Love Hard : هل الجواب فعلا بيبان من عنوانه؟!
على الرغم من أن التصنيف الفعلي لفيلم Love Hard أنه فيلم كوميدي خفيف، لكنه بيطرح سؤال في منتهى الأهمية: هل اتحولنا لناس مش بنحكم على أي حاجه غير بالظاهر؟ ونهمل الجوهر اللي ممكن يكون أحلى؟
Love Hard بيحكي عن ناتالي – قامت بالدور نينا دوبريف – اللي بتحاول ترتبط من خلال أبليكيشنز التعارف على السمارت فونز. لكن في كل مره ناتالي بتواجه فيها مشكلة مختلفة مع الشخص اللي بتقابله من التطبيقات دي.
المشاكل الأساسية اللي بتتعرض لها ناتالي، بتكون عدم الصدق، والغش والخداع، أو أن الشخص اللي هاتتعرف عليه مثالي بزياده فا يرفض يكمل معاها، أو سىء جدا بحيث هي اللي ترفضه.
ناتالي حولت المواقف الوحشه اللي بتواجهها في التعارف على النت، لوظيفة، من خلال كتابة مقالات في موقع الكتروني عن المواقف دي.
القصة بتتحول مع ناتالي لما بتقابل أخيرا الشخص المثالي بالنسبة لها. وبتقضي وقت طويل في الكلام معاه أونلاين… لحد ما بتيجي اللحظة اللي بيقولها فيها أنه بيتمني أنها تقضي معاه الكريسماس، رغم بُعد المسافة بينهم. هنا بتقرر أنها تسافر له المسافة الطويلة كلها علشان تعمل له مفاجأة. ثم بتكتشف أن الـ… مش عاوزين نحرق عليكم الأحداث أكتر من كده.
ناتالي كعادة أغلبنا في الزمن ده. اختارت أنها تحكم على الناس من ظاهرهم، ونسيت أن الجوهر هو اللي بيفضل مش الشكل أو نمط الحياه اللي بيكون مبهر من بره.
عجبنا في Love Hard الاهتمام الشديد بالتفاصيل.. لدرجة أننا في أول الفيلم بنشوف مناقشة عن الأفلام، ما بين أفضل فيلم لناتالي اللي هو Die Hard وأفضل فيلم للكريسماس من وجهة نظر حبيبها (قام بدوره جيمي او يانج) والفيلم كان Love Actually بالتالي إسم فيلمنا هو مجموع الفيلمين.. Love Hard.. ودي تفصيلة جميلة جدا.
عجبنا قوي العالم اللي ابتكره المؤلفين دانيال ماكي و ريبيكا إوينج حوالين شخصية ناتالي.. على الرغم من أن الشخصيات دي نمطية جدا: المدير حاد الطباع.. صاحبة البطلة صاحبة الجسم المليان واللي بتحرك الكوميديا في الأحداث.. وحتى عيلة حبيبها بكل تفاصيلها.
لكن السؤال: ليه عجبتنا كل الشخصيات دي رغم نمطيتها؟ السر هنا في أن Love Hardعارف (زبونه) كويس جدا جدا.. الفيلم بيستهدف الشباب والمراهقين اللي عارفين كويس أسرار مواقع وتطبيقات الـ Dating وكتير منهم استخدموا الخدمات دي بالفعل. كمان الفيلم بيتكلم عن فترة احتفالات الكريسماس بالتزامن مع فترة الكريسماس، وده بيدينا متعة إضافية في المشاهدة، كل ده بدون ما يتنازل الفيلم عن أنه يوصل رساله مهمة، هي ضرورة أننا نهتم تاني بالجوهر على حساب المظهر. بدون التنازل عن جرعة كويسه من الكوميديا والرومانسية طبعا.
Love Hard فيلم متوازن على نتفليكس.. مناسب للمشاهدة بين المخطوبين أو المتجوزين حديثا، والناس اللي اتعودت تحكم على بعضها بالشكل بس. ومش بتهتم تاخد خطوة اقرب وتعرف الناس بجوهرهم.