Luck : الحظ الوحش.. مش وحش دايما!
كام مرة اتكسر كعب الجزمة بتاعتك قبل خمس دقايق من النزول لمشوار مهم؟ كام مرة اكتشفت انك ناسي مفاتيح العربية في شقتك في الدور الـ ١٣ وأن الكهرباء قاطعه وأن وراك نص ساعة بس علشان تلحق تروح الشغل؟ كام مرة حسينا أننا في دايرة مفرغة من الحظ الوحش بدون أي بارقة أمل للنجاة؟
هو ده كان شعور سام، بطلة فيلم Luck اللي استمتعنا بمشاهدته على منصة Apple TV+ واللي بنشوف فيه قصة بنت يتيمة اتربت حياتها كلها في ملجأ، ثم بييجي الوقت اللي لازم تترك فيه الملجأ ويكون لها حياتها الخاصة في بيتها، بعد فشل كل محاولاتها أنها تلاقي أسرة بديلة.
سام بتواجه سلسلة لا تنتهي من الحظ السيء، ولما بتوصل لمرحلة الانهيار، بتقابل قط سحري بيتكلم، وبيهديها عُملة سحرية بتقلب حياتها من النقيض للنقيض، لأنها عملة جالبة للحظ. لكن لما بتضيع العملة، بتقرر سام تطارد حقها في الحظ السعيد لحد نهاية الأحداث.
من الوهلة الأولى حسينا أن Luck هو فيلم تقليدي، بيتبع في السيناريو بتاعه خطة مش بتفشل أبداً، وهي أننا نشوف تغير حال البطل من النقيض للنقيض، مع كل الكوميديا اللي ممكن يخلقها التحول ده. لكن الحقيقة أن Luck كان عنده رساله أبعد من كده عاوز يوصلها، وهي أن الحظ لوحده مش بيصنع مصير الانسان، وأنه محتاج يكون عنده إصرار وعزيمة أنه يغير حياته للأفضل. ساعتها الحظ ممكن يلعب لعبته ويقف في صفه.
اتفرجنا على نصف الفيلم بصوته الأصلي بالانجليزية، ثم كملنا مع الدوبلاج العربي المميز. شخصية سام بيقدمها بالانجليزية إيفا نوبلزادة. واللي على الرغم من أن ماعندهاش فيلموجرافيا عظيمة. لكن قدرت تقدم دور ممتاز وأداء صوتي نقل لنا أبعاد الشخصية بطريقة جميلة جدا. نفس الكلام على لوما صبري اللي قدمت الشخصية بالدوبلاج العربي، وهي بالمناسبة صاحبة الأداء العربي لشخصية الأميرة موانا في الانيميشن الجميل اللي بيحمل نفس الأسم.. لوما ما قدمتش بس صوت مناسب للشخصية، لكن روح ومشاعر متماشية معاها ومع التغيرات اللي بتحصل في حياتها.
الجميل في Luck أنه أنه بيقدم لنا أداء صوتي مميز من أسماء قوية جدا في هوليود، زي سايمون بيج و جين فوندا و ووبي جولدبيرج. كلهم قدموا أداءات مميزة قربتنا أكتر لعالم الفيلم وشخصياته
كل ده كان هايكون صفر على الشمال، لولا التقنيات المبهرة في عرض الفيلم، والتيمة اللونية المبهرة، واللي شاركت في فهمنا للأحداث بطريقة أحسن. وحسينا في رسوميات الفيلم وتحريكها أننا أمام نسخة أحدث من (شركة المرعبين المحدودة) وبشكل كبير حسينا الفيلم مستمد التيمة العامة منه.
فيلم Luck هو تجربة جميلة، لفيلم صالح لكل أفراد الأسرة، مع تجربة مشاهدة مميزة هاتعطيكم أمل أكبر في الحياة، بدون الاعتماد على ضربات الحظ اللي مش دايما بيكون في صالحنا.
