Maggie : بداية قوية ونهاية كئيبة
على الرغم من البداية القوية لفيلم (ماجي) الا ان نهايته لم تكن بنفس قوة البداية.. بدا عرض الفيلم وكان كلنا امل فى اداء مختلف لارنولد شوارزنجر بطل الفيلم بعيداً عن تعبيرات الغضب والالم والعنف اللى مكانش بيقدر يعمل غيرها فى كل افلامه. بالفعل اداؤه التمثيلي مختلف. لكنه مش بنفس الاحترافيه بتاعة باقى الممثلين المحترفين لادوار الدراما.
من بطولة أبيجيل بريسلين ارنولد شوارزينجر جويلى ريتشاردسون و جي. دي. أيفرمور واخراج هنري هوبسون بنشوف قصة البنت المراهقة (ماجي) اللى كانت بتعيش مع اسرتها فى حياه هادئة، قبل اصابه الكوكب بوباء بيحول البشر لكائنات الزومبى اللى بتاكل الاحياء وبتنقل لهم العدوي وتحولهم لزومبى زيهم.
الحكومة علشان تقدر تعالج الموضوع فرضت حجر صحي بيتم وضع المرضى المصابين بمرض الزومبى فيه، الحجر الصحي هو فكرة عزل المرضى عن الناس السليمه علشان يمنعوا انتشار المرض لهم. لكن الحقيقة انه بيتم التخلص من المرضي بعيدا عن اهلهم اللى بيحاولوا فى كثير من الاحيان انهم يخبوا الخبر او يحاولوا يتستروا على اولادهم لاطول فترة ممكنه.
ماجي مصابه بالعدوي فى مرض لا شفاء منه. الاختيارات امامها –او بمعني اصح امام والدها شوارزينجر- محدودة جدا وتكاد تكون منعدمه. الفيلم بيصحبنا فى رحلة عذاب مابين اب بيشاهد احتضار بنته وتحولها لمسخ ممكن يضطر يقتلها فى احد الايام. وبين علاج بيقتل ببطء او عزل المريض علشان يزداد مرضه ويموت يوم بعد يوم.
على الرغم من ان قصة الفيلم تبان كويسه الا ان تنفيذها على الشاشة كان كئيب وثقيل على النفس خصوصا مشاهد النهاية اللى مش عاوزين نحرقها عليكم لكنها كانت كئيبة الى اقصى درجه.
ليه لم نشعر بالتعاطف مع الفيلم؟ لاننا مش خايفين نتحول لزومبى فى يوم من الايام! لكن لو شيلنا كلمة زومبى وكتبنا اى اسم مرض تاني.. ساعتها ممكن نشعر بالتعاطف مع (ماجي) ونعتقد ان للفيلم اسقاط كبير على بعض الامراض زى الايدز مثلا، خصوصاً فى الاجزاء الخاصة بكيفية انتقال المرض ومدي مسئولية المرضى عن اصابتهم.
ماجي فيلم ثقيل وكئيب الى حد ما.. لو متوقعين تشوفوا شوارزينجر فى فيلم اكشن وكده.. استنوا احدث اجزاء The terminator … اما فيلم ماجي… قصة مختلفة تماما.
