Malavita: كوميديا تستحق المشاهدة
يا ترى إيه اللى بـ يصنع الفيلم الكويس؟ أسماء الأبطال المشاركة فيه؟ أم مجهود المخرج؟ أم القصة الجديدة ومشاهد الأكشن المنفذة باحترافية؟ حاجات كثير جدًا بـ تحدد تقييمنا كمشاهدين للأفلام، وفى رأينا أن الفيلم الجيد هو اللى صناعه بـ يقدروا يقدموا “توليفة” تجمع الحاجات دى كلها مع بعض فى مزيج واحد، السؤال هو: هل قدر صناع فيلمThe family أو Malavita فى تقديم المطلوب منهم لعمل التوليفة الصحيحة للنجاح؟
الإجابة ببساطة هى: نعم. التوليفة كانت مضبوطة المرة دى، لما بـ نشوف فيلم من إخراج لوك بيسون، وبطولة روبرت دى نيرو، ميشيل فايفر، تومى لى جونز وغيرهم، لازم نعرف أننا أمام فيلم مختلف.. جدًا.
الفيلم بـ يحكى عن عائلة بـ يتم إرسالها لفرنسا ووضعها تحت برنامج حماية الشهود الأمريكى نتيجة شهادة الأب ضد عصابات المافيا، العائلة اللى مش قادرة تنسى خلفيتها الإجرامية بـ تبدأ تمارس نشاطها الإجرامى فى فرنسا، فى مشاهد بـ تجمع بين الكوميديا الذكية المعتمدة على المواقف الكوميدية، أو من خلال مشاهد الأكشن اللى تم التركيز عليها فى الربع الأخير من الفيلم.
كان واضح أن الديكور والموسيقى التصويرية تم توظيفهم بشكل كبير وأساسى فى أحداث الفيلم، الموسيقى التصويرية بالذات كان لها أثر كبير فى نفوسنا مع بعض الأنغام اللاتينية اللى كنا بـ نسمعها فى خلفية بعض المشاهد، والديكورات كمان ما نقدرش ننسى دورها وأثرها الكبير فى أننا دخلنا مود الفيلم بسهولة.
الثلاثى دى نيرو، فايفر، لى جونز، قدروا أنهم يثبتوا أن من الممكن التعاون بين النجوم الكبار لإنتاج أعمال سينمائية محترمة، دى رسالة بـ نحب نوجهها لنجوم مصر الكبار اللى كل واحد فيهم محتفظ بشلة من الممثلين اللى مش بـ يطلع غير معاهم، ومش بـ نشوف تعاون أسماء كبيرة مع بعضها غير فى بعض الأعمال النادرة زى عمارة يعقوبيان أو ليلة البيبى دول.
The Family من الأفلام اللى تستحق المتابعة واللى ممكن ترسم الابتسامة على وجوهنا، خصوصًا بعد مذبحة الأفلام اللى تابعناها فى فترة عيد الأضحى.
