Malevolent : السحر لما ينقلب على الساحر!
الأمثال الشعبية بتقول أن السحر ممكن ينقلب على الساحر. والمثل ده بيتقال لما حد يكون فاكر نفسه بيفهم كويس في حاجه معينه. وإنه حويط ومافيش حد يقدر يعمل اللي بيعمله أحسن منه. ثم في النهاية يقع في نفس الفخ أو يلاقي حقيقة جديدة تقلب كل معتقداته.
هو ده اللي حصل بالظبط مع أنجيلا وجاكسون – فلورنس بوغ و بن لويد هيوز- الأخ والأخت، واللي بيشكلوا مع بعض فريق لتزييف الأحداث المرعبة علشان ياخدوا فلوس. لكن كل عملهم بينقلب رأسا على عقب لما بيواجهوا ظاهرة مرعبة حقيقية ومخيفة.
قصص أفلام الرعب بتكون مستهلكة وضعيفة في الغالب. لكن الوضع مع فيلم Malevolent كان مختلف شويه. يمكن بسبب أن الفيلم مقتبس عن رواية إيفا كونستانتوبولس وكتب السيناريو الخاص بها بن كيتاي ثم أخرجها أولاف دي فلور جوهانسن. والحقيقة أن الفيلموجرافيا الخاصة بأولاف مش قوية. لكنه قدر في Malevolent يقدم فيلم رعب جيد. بالمقارنة بأفلام رعب تانيه بيتم عرضها على شبكة Netflix
أضعف حلقة في الفيلم كانت السيناريو اللي كان بادىء بشكل قوي، ثم ومع الأقتراب من نهاية الأحداث بيبدأ في الضعف. ونبدأ نشوف أبطال الفيلم بيتصرفوا بغباء في بعض المواقف. والحقيقة أن ده مش غريب على أفلام الرعب بصفة عامة، واللي بتضطر الكتاب في بعض الأحيان يخلوا الأبطال يتصرفوا بغباء علشان تستمر الحبكة في العمل.
لكن بصفة عامة نقاط ضعف الفيلم مش مؤثرة بشكل كبير على تجربة المشاهدة، خاصة عند المشاهدين اللي بيحبوا أفلام الرعب. وده نتيجة الأداء التمثيلي القوي والمؤثرات الخاصة اللي ابتعدت في جانب كبير منها عن استخدام خدع الكمبيوتر على حساب استخدام حيل الماكياج واللي كانت قوية ومؤثرة.
Malevolent أكيد مش أفضل فيلم رعب شوفناه. لكن لو كنتم من محبي أفلام الرعب وعندكم أستعداد تتجاوزوا عن بعض مشاكل السيناريو والقصة. ننصحكم في الحالة دي تشوفوا الفيلم.
