Man Down : دراما الحرب
واضح إن سينمات القاهرة هاتشوف أفلام كتير عن فترات الحروب اللى خاضتها الولايات المتحدة سواء كانت الأفلام دي عن الحرب العالمية الثانية زي فيلم USS Indianapolis: Men of Courage أو فترة الحرب على العراق وأفغانستان زي الفترة للى بيتكلم عنها فيلمنا اليوم.
فيلم Man Down من تأليف أدم سيمون وسيناريو وحوار وإخراج ديتو مونتيل، البطولة كانت من نصيب شيا لابوف و جاري اولدمان و جاي كورتني و كيت مارا و كليفتون كولينز جونيور و تشارلي شوتويل.
الفيلم بيحكي عن المحاولة المستميتة من أحد جنود المارينز السابقين (جابرير درامر) العثور على ابنه بعد فقدانه فى حادث مروع لفرقة من جنود المارينز.. عملية البحث بيخوضها الأب وأحد الناجين من العملية، وأقرب صديقه لإبنه.
الأداء التمثيلي لكل الأبطال كان متوسط، لكن لازم نقول أن الأداء التمثيلي لشيا لابوف كان متميز عن باقى الأبطال، وقدر يقدم لنا تعبيرات بوجهه وصوته وعينه وكل ملامحه علشان يقدم لنا الدور اللى بيقوم بيه بمنتهي الإحترافية والإقناع، ونقدر نقول انه (شال الفيلم على كتفه) تمثيلياً إذا جاز بنا التعبير.
من أكتر الأمور المميزة فى الفيلم: الموسيقي التصويرية المتميزة والمتلاحقة والمعبرة عن كل تفصيلة فى الأحداث.. والحقيقة إن الموسيقي فى الفيلم كانت عارفه إمتي تكون مركزة ومؤثرة وإمتي تكون هادية وفى الخلفية وإمتي تتوقف خالص علشان تخلينا نركز فى الأحداث، وده شىء ايجابي جدا يحسب للقائمين على الفيلم.
فى بداية مشاهدتنا لأحداث الفيلم كنا متوقعين أننا امام فيلم حربي بنسبة 100% لكن الحقيقة إن الجانب الحربي للأحداث بيختفى بعد فترة وبيبدأ الفيلم ياخدنا لمنطقة إنسانية بالمقام الأول.. والسيناريو عرف يوزع الأحداث مابين الجانب الحربي والجانب الإنساني بشكل جيد.
إخراج الفيلم كان قوي وقدر يستفيد من عناصر القوة فى الفيلم علشان يتجنب عوامل الضعف، وقدر المخرج يقدم لنا حركة كاميرا جديدة وقوية، كمان الإضاءة والديكور لعبوا دور مهم فى الأحداث وخاصة ديكورات المناطق الحربية وإخراج مشاهد الإقتحام والإشتباك.
Man Down بالتأكيد مش أفضل فيلم حربي إنساني نشوفه.. لكنه تجربة سينمائية محترمة تستحق نعطيها فرصة.
علشان تبقى عارف:
تم تصوير الفيلم خلال 28 يوم فقط.
الفيلم يعتبر ثاني تعاون بين الممثل (شيا لابوف) والنجم (جاري أولدمان) بعد تعاونهما في فيلم (Lawless) عام 2012.
