Marauders: الموضوع أكبر من مجرد سرقة بنك!
عمركم سألتم نفسكم عن سبب وجود البنوك فى أفلام هوليود؟ علشان الناس تودع فيها فلوس؟ لا! علشان الناس تعمل فيها شهادات استثماء؟ إجابة خاطئة! الهدف الحقيقي من وجود بنك فى أفلام هوليود هو أنها تتعرض للسرقة! بداية من فيلم The Bank Job مرورا بـ The Inside Man ونهاية بفيلم اليوم… واللى كمان بيحكي عن سرقات متعددة للبنوك.
من تأليف مايكل كودي وإخراج ستيفن سى ميلر وبطولة باتيستا وبروس ويلز و داني أبيكاسر بنشوف قصة مجموعة من اللصوص المحترفة، عديمو الرحمة، واللى بينفذوا مجموعة من سرقات البنوك بدون ترك أي أثر، الأمر اللى بيخلي المباحث الفيدرالية بتضرب أخماس فى أسداس وبتحاول تمسك عليهم أي دليل.
بعد فترة بيبدأ رجال الشرطة فى ملاحظة أن عمليات الإقتحام والقتل اللى بتقوم بيها العصابة مش عشوائية، وأن هناك خيط أو رابط مهم بين العمليات دي وبين بعضها البعض، كمان بيكتشفوا إن… الحقيقة مش عاوزين نحرق عليكم الأحداث أكتر من كده.
على الرغم من أن القصة مشوقة وفيها كتير من مشاهد الإشتباك والأكشن، إلا أن الفاصل الزمني بين مشاهد الأكشن كان بيبعث على الملل بعض الشىء، لكن الأداء التمثيلي للأبطال كان بيعوض الملل ده بكتير من الجمل الحوارية القوية والمواقف التمثيلية المتميزة، وطبعا ما نقدرش ننكر دور مشاهد الأكشن والقتال وإطلاق النار واللى كان تنفيذها جميل ومختلف ومتميز.
الموسيقي التصويرية للأحداث الفيلم كانت جميلة وحماسية، وكانت قادرة على التكيف مع أحداث الفيلم بحيث ترتفع مع مشاهد الأكشن والحركة وتقل مع مشاهد التخطيط والتفكير بشكل يسمح لنا بالمتابعة والأستمتاع، لكن أكتر ما يعيب الفيلم كان تمويله الضعيف وعدم الأهتام بعمل مشاهد قوية ومؤثرة ومصروف عليها أنتاجيا بشكل قوي ومؤثر.
Marauders فيلم تشوفه لو كنت بتحب مشاهد الأكشن وأفلام سرقات البنوك.. لو مش بتحب النوعية دي من الأفلام ننصحك تشاهد فيلم تاني لأن فيلمنا مش هايعجبك.
