Mary Queen of Scots : حرب باردة على السلطة.
الأفلام اللي بتتناول الصراع على السلطة بيكون لها دائما مذاق خاص. حتى لو الصراع بيدور عن الأحداث اللي بتتم في الكواليس والحرب الباردة بين أصحاب الحقوق – أو المتخيلين أنهم أصحاب الحق- في الفوز بالعرش.
والحقيقة أن التيمة دي مش جديدة. يكفي مسلسل كامل زي game of thrones اللي يعتبر من أشهر الأعمال الفنية اللي تناولت الصراع على العرش. لكن بصورة أكثر دموية من اللي بنشوفها في Mary Queen of Scots.
Mary Queen of Scots بيحكي عن الصراع بين الملكة اليزابيث الأولى و ماري ستيوارت – بيجسد دور الملكة اليزابث مارجوت روبي و سيرشا رونان دور ماري ستيوارت- للوصول للعرش. المحاولات اللي بتاخدنا في سلسلة من الصراعات اللي مش بتنتهي على مدار أحداث الفيلم اللي بتمتد لحوالي ساعتين هي زمن الفيلم.
من أقوى عناصر الفيلم الأداء التمثيلي المميز لأبطاله. مارجوت روبي قلعت عباية أفلام الأبطال الخارقين اللي أرتدتها في Suicide Squad بنجاح، وقدرت تقدم دور قوي يثبت أنها مش مجرد وجه جميل. لكن طاقة تمثيلية وابداعية متميزة. وده اللي قدرت المخرجة خوسيه رورك تؤكد عليه وتبرزه من خلال توجيهاتها لمارجوت.
ومع فيلم بتقوم ببطولته شخصيات نسائية مع إخراج نسائي نقدر نقول أن الفيلم مهتم في جانب منه بإبراز الصراع الذكوري على السلطة في مقابل الزحف النسائي للحصول على نفس الحق في فترة زمنية كان جديد فيها فكرة حصول المرأة على السلطة.
قد يعيب Mary Queen of Scots غياب الأكشن بشكل كبير عن الأحداث، لكنه في المقابل بيقدم حرب باردة بياخد فيها الحوار جانب كبير من الأهتمام علشان يظهر دوافع الشخصيات الأساسية له. لكن من ناحية تانيه المشاهدين اللي منتظرين أحداث جديدة مع كل مشهد مش ها يلاقوا ده في الفيلم.
بنرشح Mary Queen of Scots للمشاهدة من الناس اللي بتحب تيمات الأفلام اللي بتدور عن المؤامرات الخفية والمكائد المستترة. هايلاقوا في الفيلم متعة إضافية.
