Mary : فيلم عبارة عن قنبلة كليشيهات
تعمل ايه لما يقرب عليك موسم الهالوين وعاوز تقدم فيلم رعب يلم كام مليون دولار إيرادات؟ تجيب كل كليشيهات أفلام الرعب وتحطها في فيلم واحد وتسميه Mary !
Mary بيحكي عن أسرة بتحاول تشتغل في عالم البيزنس من خلال شراء سفينة والعمل عليها. وفي البداية الأمور بتمشي بشكل جيد لكن بعد كده بتبدأ سلسلة من الأحداث المرعبة والماورائية في الحدوث لكل أفراد الاسرة.. وللسفينة نفسها!
قصة الفيلم كان ممكن يتم تقديمها بشكل أفضل لو مكانش المخرج مايكل جوي صمم يضع كل كليشيه اتعمل في فيلم رعب قبل كده في فيلمه. بداية من الحبس في أماكن مغلقة مع اشباح أو الكائنات اللي بتظهر من جوانب المشهد، أو حتى حبكة السفينة أو المكان المسكون بأرواح شريرة.
الأداء التمثيلي كمان مكانش قوي اللهم إلا جاري أولدمان اللي قدم أداء مقبول الى حد ما. وكان واضح الميزانية القليلة اللي بيتحرك فيها الفيلم واللي جعلت تنفيذ المشاهد المرعبة من أضعف ما يكون ومستوى المؤثرات والخدع السينمائية مش قوي.
Mary فيلم رعب تشوفه لو كنت من محبي أفلام الرعب مهما كان مستواها. أو لو عندك حوالي ساعتين مش عارف تعمل فيهم ايه!
