Masterminds : الحقيقة تغلب الخيال!
لازم نعترف إننا من محبي الأفلام المقتبسة عن قصة حقيقية. يمكن لأنها بتحفزنا دائماً على البحث عن القصص الحقيقية وراء أحداث الأفلام اللى بنشوفها، وعلشان بتثبت لنا دائما وأبدا إن الحقيقة أحيانا ممكن تكون أكثر إدهاشاً وتعقيداً من خيال المؤلفين مهما كان جامح!
Masterminds من بطولة زاك جاليفينكس و أوين ويلسون و كريستين ويج و ماري إليزابيث إليس ومن تأليف هابل بالمر و إخراج جاريد هس.
الفيلم بيحكي عن أحد حراس البنوك فى الولايات المتحدة، واللى بيقع بالكامل تحت سيطرة زميلته السابقة فى العمل، واللى بتقنعه إنه يسرق مبلغ ضخم من البنك لحسابها هى وصديقها القديم بدافع الحب.. بطلنا ديفيد لما سرق البنك ما كانش يعرف إنه تقنياً بيقوم بأكبر سرقة بنك فى التاريخ الأمريكي… وإن المبلغ اللى سرقه كان حوالى 17 مليون دولار!
بتبدأ الأحداث تاخد منعطف مجنون شوية بعد كده، لما بتحاول العصابة المكونة من 3 أشخاص إنها تغدر بالمنفذ الأحمق ديفيد، ومحاولة قتله من خلال إرسال قاتل محترف للمكسيك للقضاء عليه.. ثم بتستمر الأحداث اللى مش عاوزين نحرقها على المشاهدين…
سيناريو الفيلم كان متميز وقدر يلفت انتباهنا من بداية الأحداث لنهايتها، لم نشعر بالملل أو الرغبة فى تسريع خط سير الأحداث بل على العكس حسينا إن كل حاجه مظبوطة وفى وقتها بالظبط، لكن غرابة القصة كانت بتخلينا نسأل نفسنا هل فعلا الفيلم مقتبس من أحداث حقيقية؟! والحقيقة إن الإجابة اللى تأكدنا منها بعد بحثنا عن جذور وقصة الفيلم إن 90% من الأحداث حدث بالفعل.
الأداء التمثيلي للأبطال كان جيد جدا خاصة زاك جاليفينكس بطل سلسلة The Hangover الشهيرة واللى قدر يمزج بين الكوميديا والواقع الأليم فى أحداث الفيلم، وإن شعرنا إن مساحة الكوميديا كانت محتاجه تكون أكبر من كده.
الموسيقي التصويرية كانت باهته، أما الديكورات فكانت أكتر من رائعة وعكست الجو العام للاحداث، ولو كانت الموسيقي التصويرية أفضل والكوميديا أكتر كان ممكن نقول إننا شاهدنا واحد من أحسن الأفلام فى 2016
Masterminds إثبات واقعي على فكرة إن حياتنا فيها وقائع وأحداث لو اتقارنت بالأفلام والمسلسلات هاتكون أغرب منها وأكتر تشويقاً!
