Me Before You: تيمة رومانسية وأحداث عادية.
على الرغم من إن بقالنا كتير ماشوفناش أفلام رومانسية، وعلى الرغم من إعجابنا بالفيلم بعد مشاهدتنا التريلر الخاص بالفيلم، إلا أننا أثناء مشاهدتنا للفيلم حسينا بكتير من الملل، وحسينا أن القصة الرومانسية الجميلة ماقدرش القائمين على الفيلم يحولوها لعمل متميز.. لكن فى النهاية يظل الفيلم جميل لكل رومانسي مستني يشوف قصة جميلة ومؤثرة على الشاشة.
من إخراج ثيا شاروك وتأليف جوجو موياس اقتباساً عن روايتها ومن بطولة تشارلز دانس و جانيت ماكتير و سام كلافلن و اميليا كلارك بنشوف قصة الشابة الجميلة (لو كلارك) واللى بتدفعها ظروفها المادية الصعبة للعمل كجليسة لشاب فى مقتبل العمر بيتعرض لحادثة صعبة بتخليه معاق ومش قادر يحرك غير رقبته فقط. طبعا إحنا عارفين إن لازم قصة رومانسية قوية تتطور بين الإتنين، ونبدأ ندخل فى فصول وأحداث جديدة مش عاوزين نحرقها عليكم علشان فيه أكتر من خيط تاني بيدخلوا فى الأحداث زي قصة صديق لو كلارك واللى بيشعر بالغيرة على حبيبته وعلاقتها اللى بتزيد يوم بعد التاني مع الشاب المعاق.
ديكورات الفيلم كانت قوية ومتميزة، والتصوير فى مناطق مختلفة خصوصاً المناطق المفتوحة والمناظر الطبيعية اللى قدمها لنا الفيلم كانت قوية وجميلة فى مجملها، على العكس من الموسيقي التصويرية اللى مكانتش بالقوة اللى كنا متوقعينها، وكان المفروض نشوف موسيقي أقوي وأحلى من كده خاصة اننا بنتفرج على فيلم رومانسى بالأساس.
الناس اللى دموعها قريبة وبتتأثر بأي حدث بقوة ننصحهم ما يشوفوش الفيلم ولو شافوه بلاش يتأثروا بيه قوي إلا لو كان عندهم رغبة قوية فى البكاء! لكن نحب نطمنهم ان جرعة التراجيديا فى الفيلم مش بتبدأ غير فى الربع الأخير من الأحداث.
على الرغم من قوة الأداء التمثيلي للأبطال إلا أن الفيلم فى مجمله كان بينتابنا أثناء مشاهدته حالة كبيرة من الملل، وكان تركيز السيناريو منصب على التركيز على المشاعر الإنسانية أكتر من الأحداث نفسها، وده ممكن يكون سبب الملل عند بعض المشاهدين.
Me Before You ميزته الوحيده هى أنه فيلم رومانسى فى وقت اشتقنا فيه لفيلم يكسر حدة أفلام الأكشن والرعب ويقدم ما هو اقوي وابعد من الكوميديا.
