Men in Black: International : إبهار بدون كوميديا
على الرغم من شعورنا بعدم اهتمام هوليود بسلسلة أفلام Men in black والدليل على كلامنا الفترة الزمنية الطويلة بين كل جزء والثاني، إلا أن Men in Black: International يعتبر زيارة جيدة لعالم يستحق الاهتمام أكتر من كده.
في Men in Black: International بنشوف رحلة مجندة جديدة في صفوف “الرجال أصحاب البدل السوداء” بداية من عدم معرفتها معلومات كتير عن عالم الفضاء ونهاية بتحولها للعميلة M اللي بتشترك في عمليات في غاية الغرابة مليانة بكائنات فضائية ومطاردات بمركبات متقدمة جدا.
الكيمياء بين كريس هيمسورث و تيسا تومبسون كانت رائعة زي ما كانت في Thor: Ragnaroلكن من ناحية تانيه مستوى الكوميديا كانت قليلة جدا. على العكس من السلسلة القديمة اللي كان ويل سميث بيوقعنا على الأرض من الضحك حرفيا.
لكن الميزة اللي بييجي بيها Men in Black: International هي التطور على مستوى المؤثرات الخاصة والخدع السينمائية. والحقيقة الفيلم قدم مستوى راقي جدا من الخدع اللي بتخلي كل مشهد تحفة وابهار عالي جداً.
ما تتوقعوش من Men in Black: International نفس مستوى الكوميديا. وما تتوقعوش نفس إحساس (النوستالجيا) اللي بيجيلنا لما بنتفرج على الأجزاء القديمة من السلسلة. لكن Men in Black: International ينفع كفيلم خفيف نختم بيه الخروجة في الويك إند.
