Mia and the White Lion : جربت تربي أسد في البيت؟!

بعض الناس بتخاف تربي كلب في البيت. والبعض مابيحبش صوت القطط لما بتكون جعانه. اما بالنسبة لـ(ميا) فقدرت تعيش حياه كامله مع أسد أبيض في الفيلم الفرنسي Mia and the White Lion

الفيلم بيعرض تحت أسم أخر هو Mia et le lion blanc وده هو الإسم الفرنسي له. وبيحكي عن ميا (بتقوم بدورها دانيا دو فيليرز) واللي بترتبط عاطفيا بأسد بتربيه وهو صغير. لكن مع تقدمه في العمر بيقرر والدها (صاحب مزرعة تربية حيوانات) انه يبيع الأسد لمحبي اقتناء الحيوانات النادرة. ومن هنا بتقرر ميا الهرب مع الأسد!

من أمتع وأروع الأمور في الفيلم هي المونتاج العبقري واللي بيجمع اللقطات وقدر يدمج بينها ويخرجها بالشكل النهائي اللي شوفناه بيها. كمان المخرج جيل دو ميست قدر يقدم مجموعة من المشاهد المميزة بلقطات واسعه مليئة بالألوان والبهجة والحيوية. والحقيقة أن التضافر بين المونتاج والإخراج مع أماكن التصوير قدمت لنا في النهاية فيلم مبهج وممتع بصريا الى اقصى درجه.

الأداء التمثيلي لابطال الفيلم دانيا دو فيليرز و ميلاني لوران و لنجلي كيركود كان مميز جدا، وقدروا يقدموا لنا تعبيرات مميزة وأداء قوي. لكن لازم ننبه المشاهدين أن محبي الأفلام اللي فيها حركة وسرعة واحداث متلاحقة ومتتابعة مش لازم هايلاقوا اللي بيدوروا عليه في Mia and the White Lion لان الفيلم بيعتمد على رتم أبطأ شويه من كده. وفي نفس الوقت الفيلم مش ممل. لكن مش بالسرعة اللي هايتوقعها البعض منه.

في النهاية.. فيلم Mia and the White Lion مميز جدا وبنرشحه لمحبي مشاهدة الأفلام عن الحيوانات. وخاصة العلاقة الخاصة جدا بين الإنسان والحيوان.