Middle School: The Worst Years of My Life : كوميديا المدارس الثانوية
مرحلة المراهقة والمدارس الثانوية، واحدة من أكتر الفترات اللى تناولتها الأفلام الهوليودية الكوميدية، السبب الأول لحالة الزخم السينمائي للفترة دي هى كترة السيناريوهات والأعمال اللى بتتناول الفترة دي، والسبب التاني هو مغازلة هوليود لفئة من أكتر الفئات المقبلة على مشاهدة الأفلام فى الولايات المتحدة، وده بيعمل نجاح شبه مضمون للأفلام اللى بتخاطب الفئة دي.
فيلمنا اليوم من بطولة توماس باربوسكا و لورين جراهام و إيزابيلا مونير و جريفين جلوك و روب ريجلى و آدم بالي ومن تأليف كارا هولدن وكريس بومان، ومن إخراج ستيف كار.
الفيلم بيحكي عن راف كاتشادوريان الشاب اللى على اعتاب المراهقة، واللى بيحب الرسم والفن، وبيلتحق بمدرسة ثانوية لها قوانين وقواعد صعبة جداً وفى منتهي الصرامة، الأمر اللى بيخلق كمية من المواقف الكوميدية لما بيقرر راف إنه يكسر كل قواعد المدرسة وكل القوانين اللى تم وضعها على مدار السنوات الماضية.
الفيلم حاز على تقييم 5.8 من 10 على موقع IMDB المتخصص فى تقييم الأفلام، وهو تقييم متوسط بالنسبة لباقي الأفلام، لكنه تقييم مرتفع بالنسبة للأفلام اللى بتتكلم عن فترة الثانوية والمراهقة.
الأداء التمثيلي للأبطال كان متميز وكوميدي الي اقصى درجة، أيضاً تصميم المشاهد الكوميدية كان متميز ومعتمد على المواقف الكوميدية أكتر من اعتماده على الإيفيهات.
من الأمور الجيدة فى الفيلم الخلط بين المشاهد الحقيقية ومشاهد الأنيميشن بشكل متميز وجذاب للعين جدا، وتزامن ده مع موسيقي تصويرية جميلة ودخلتنا فى مود الأحداث من المشهد الأول بسرعة وسهولة.
سيناريو الفيلم منقسم لفصول شبه واضحة للمشاهدين.. الفصل الأول التعريف بالأبطال، والثاني الخاص باستعراض المدرسة واللى بيحصل فيها وقواعدها، ثم الفصل الخاص بالحدث الرئيسي وهو تحطيم قواعد المدرسة، ثم فصل الختام اللى بنستعرض فيه النتائج النهائية للأحداث و الخاتمة المناسبة للفيلم.
والحقيقة ان السيناريو ده بالتقسيمة دي كان كويس جدا وساعدنا على فهم الأحداث والإندماج فيها بسهولة، وخلانا نتفرغ أكتر للكوميديا المتميزة والجميلة.
Middle School: The Worst Years of My Life بالتأكيد مش أحسن فيلم كوميدي شوفناه فى حياتنا، لكنه من أحسن أفلام الكوميديا الخاصة بفترة المراهقة والثانوية.
