Midsommar : الرعب القادم من السويد!
لما نتكلم عن السويد، معظمنا هاييجي في باله أنها مدينة الثروة والرخاء والحياة البسيطة المرفهة. لكن المخرج والمؤلف آري آستر قرر يقدم لنا وجه مختلف للسويد.. وجه مرعب.
Midsommar بيحكي عن داني (بتقوم بدورها فلورنس بوغ) واللي بيحصل لها مأساة عائلية ضخمة. وبعدها بتقرر السفر للسويد مع مجموعة من الأصدقاء علشان تحضر مهرجان مش بيقام غير مرة كل ٩٠ سنة! المهرجان اللي المفروض يغير حياة الجميع للأحسن بيكتشفوا أنه مجرد واجهة لأعمال سحرية بتمارسها طائفة غريبة. وبتستمر الأحداث مع حالة من الغموض والاثارة.
مش غريب على المخرج والمؤلف آري آستر انه يقدم الحالة دي من الغموض الممزوج بالرعب في أفلامه، سبق له وقدم تجربة مشابهة في فيلم Hereditary لكن هنا بنشوف مستوى وأسلوب مختلف شوية في الرعب.
المختلف المرة دي أن الأحداث المرعبة مش بتتم بالليل زي معظم أفلام الرعب. بالعكس بنشوف المشاهد المخيفة بتحصل في وضح النهار وفي مشاهد كلها ألوان وبهجة. المزيج ده مش هايعجب محبي أفلام الرعب التقليدية. لكن الناس اللي زهقت من أفلام الرعب التقليدية هاتشوف في الفيلم تجربة مختلفة وتستحق المشاهدة.
فلورنس بوغ قدمت دور جيد جدا. ودي من المرات النادرة اللي نقدر نحكم على تمثيل الأبطال من أدائهم في فيلم مرعب. لأن زي ما قولنا الرعب هنا مختلف وبيدي مساحة للأبطال علشان يقدموا أداء تمثلي قوي نقدر نفتكرهم بيه.
Midsommar هايكون فيلم مناسب لو كنتم بتدوروا على فيلم رعب مختلف بيدور في أجواء مختلفة. لكن في نفس الوقت لازم يكون عندكم القدر الكافي من الصبر على أحداث بتستوي على نار هادية في مدة حوالي ساعتين ونصف. بعيدا عن الرتم السريع المعتاد لأفلام الرعب.
