Midway: قصة أهم موقعة بحرية في التاريخ!
مع اقتراب الحرب العالمية الثانية من نهايتها وجه سلاح الطيران الياباني ضربة خطيرة على ميناء بيرل هاربور. واحد من أهم المواني العسكرية الأمريكية. الهجوم كان كاسح ونتائجه كانت كارثية على الأمريكان. وأجبرتهم على دخول الحرب العالمية الثانية. بعد فترة قصيرة نسبيا من الهجوم. خططت اليابان لهجوم تاني. لكن المرة دي كان الأمريكان على استعداد لهم. ومن هنا بتيجي أهمية موقعة Midway اللي بتعتبر من أهم المعارك البحرية في التاريخ الحديث.
فيلم Midway بيتناول الفترة الزمنية الصعبة للحرب العالمية الثانية من وجهه نظر مجموعة من الرجال اللي شاركوا في الحرب. وبيستعرض لنا الحالة النفسية والإنسانية والاجتماعية والعسكرية لأمريكا في واحدة من أصعب الفترات اللي مرت عليها.
من أجمل الأمور اللي عجبتنا في الفيلم الأداء التمثيلي المميز من وودي هاريلسون و لوك إيفانز و ماندي مور وباقي أبطال الفيلم. وحسينا بالتناغم الرائع بين كل أبطال الفيلم وعرفنا أن وراء ده المخرج رولاند إيمريش اللي قدر يخلق حالة جميلة بين أبطال فيلمه.
لكن وعلى الرغم من تخصص رولاند إيمريش في اخراج الأعمال المعتمدة على ميزانيات ضخمة وخدع سينمائية كبيرة زي White House Down و Independence Day: Resurgence وغيرها. شغل ايمريش على صعيد المؤثرات الخاصة كان ضعيف جدا وحسينا في بعض المشاهد بشغل المونتاج والجرافيك اللي كان واضح جدا. وكأن الفيلم منتج في السبعينيات مثلا مش في ٢٠١٩! ودي تعتبر من أكبر عيوب الفيلم من وجهة نظرنا.
وعلى الرغم من قوة Midway على أكثر من عامل زي الموسيقى والديكورات اللي نقلتنا لفترة الحرب العالمية الثانية. لكن في رأينا أن المشاهدين اللي مش متعمقين في الجزء ده من التاريخ مش هايحسوا بمتعة كاملة في المشاهدة. خاصة أننا حسينا أن الفيلم (أمريكي) أكثر من اللازم يعني موجه بالمقام الأول للمشاهدين الأمريكان اللي أكيد عارفين الجزء ده من تاريخ بلادهم بشكل أكبر.
Midway فيلم قوي محتاج حد (مذاكر) الحرب العالمية الثانية كويس علشان يستمتع بيه.
