MindScape : لعبة عقلية سينمائية
يبدو ان صناع الافلام الهوليودية، اتفتحت عينهم مؤخرا على نوعية الافلام اللى بتجمع بين الأثارة والغموض، مع أساليب خداع المشاهد واللعب على مشاعره وقدرته على استيعاب الأحداث. وبنعتقد ان فيلم زي Gone Girl فتح شهية الكُتاب والمخرجين لعمل أفلام مشابهة.
من تأليف جاي و مارثا هولمز، واخراج جورج دورادو، بنشوف قصة عن المستقبل القريب، البشر أصبح عندهم القدرة على الدخول لذكريات الأخرين، مش كل البشر، بعض الصفوة اللى بيتمتعوا بقدرات خاصة، واللى بيشتغلوا فى شركة تحقيقات خاصة بتساعد الحكومة فى الوصول لحقائق الجرائم، من خلال معرفة ذكريات المشتبه بيهم.
جون، واللى بيقوم بدوره مارك سترونج، بيلعب دور محقق خاص من أكفأ المحققين اللى عندهم قدرة الدخول لذكريات الأخرين، بيتعرض لمشكلة بعد وفاة زوجته، بتؤدي لتدخل ذكرياته الخاصة مع ذكريات الناس اللى بيحقق معاهم، الامر اللى بيتطلب منه الحصول على اجازة مؤقته، بيعود منها لقضية –المفروض- انها سهلة وها تدخل له مقدار كويس من النقود.
(أنا) أو تايسا فارميجا، بتلعب دور بنت مراهقة، بترفض تناول الطعام، اضرابها عن تناول الطعام بيدفع اهلها الاغنياء للاستعانة بمجهودات المحقق جون، بالنسبة لجون معالجة انا المفروض تكون مهمة سهلة، لكن الموضوع بيتطور وبيتشابك وبيسحبنا معاه فى مرحلة من الغموض والتشويق مش عاوزين نحرقها عليكم.
مانقدرش نعتبر الفيلم مرعب، لكن مانقدرش نقول فى نفس الوقت انه خالى من الرعب! الفيلم قدر يضع المشاهدين فى حالة من عدم الراحة النفسية، واللى فى رأينا بتكون أقوي من الرعب المبني على المفجأت والتلاعب بشريط الصوت الخاص بالفيلم، نقدر نقول ان Mindscape بيقدم حالة من الرعب النفسى المدعومة بقليل من الرعب التقليدي، الامر اللى بيجعلنا نقدر الحالة النفسية اللى بيحاول صناع الفيلم وضعنا فيه.
مارك سترونج قدم واحد من افضل اعماله، وقدر يجسد شخصية الرجل المهموم المكسور المهتم بمشاكله الشخصية، واللى بيسعي فى نفس الوقت لفك غموض (أنا) او تايسا فارميجا، واللى نقدر نقول انها لعبت افضل ادوارها على الاطلاق، من خلال شخصية البنت المراهقة اللى بتعاني من مشكلة نفسية كبيره.
الموسيقي التصويرية والمؤثرات الصوتية لعبت دور مهم وحيوي فى احداث الفيلم، وكانت متسقة مع الخيط العام للاحداث بشكل متميز، الديكورات كمان والاضاءة كان لهم دور مهم ومؤثرا خصوصا فى مشاهد الرعب والتشويق، وغيرها من المشاهد.
Mindscape من الأفلام القوية والمتميزة، وننصحكم بمشاهدتها بتركيز واهتمام، واستمتاع بالاداء التمثيلي للابطال والاسلوب الاخراجي.
