Moana: إتمسك بحلمك للنهاية!

عندك حلم؟ عندك رؤية ووجهة نظر؟ قلبك حاسس إن سكة معينة هى الصح ليك وللناس اللى بتحبهم؟ وفقاً لفيلم Moana هو ده كل اللى انت محتاجه علشان تبدأ رحلتك الشخصية علشان تصنع أسطورتك الذاتية، وعلشان تبقى إنسان عظيم وتتبع حلمك وهدفك… مهما حاول اللى حواليك يقولولك إنك غلط.. ومهما بانت السكة طويلة والمجهود كبير.

موانا واللى هو  إسم  الفيلم، فى نفس الوقت إسم  البطلة الرئيسية لأحداث فيلمنا… الفيلم بيحكي عن قصة موانا، إبنة زعيم قبيلة عايشة فى جزيرة هادية وسكانها ودودين ومسالمين.

كل شىء بيتم ببساطة وسهولة، الى أن تقرر موانا لما تكبر فى السن إنها تتجه للبحر وتبحث عن بطل أسطورى قادر على عمل أشياء عظيمة علشان تقدر تنقظ أهل جزيرتها من مستقبل مظلم  بعد بداية الطبيعة فى إظهار غضبها ضد أهل الجزيرة السالمة.

Moana من بطولة الأداء الصوتي لـ  أولي كارافالو و دواين جونسون و ألان توديك و ريتشيل هاوس و  جيمني كليمنت و  تيمويرا موريسون ومن تأليف وإخراج رون كليمنتس واللى قدر يوجه الفنانين اللى شغالين معاه فى الفيلم علشان يطوعوا قدراتهم الصوتية لخدمة أدوارهم فى الفيلم، بشكل قدم الشخصيات بشكل متميز جداً، وأعطي للشخصيات المرسومة على الورق أمامنا روحا وبعدا جديدا ومتميزا.

نتكلم بقى عن الدقة المتناهية والرائعة فى تصميم الشخصيات..بداية من ملابسها ونهاية بحركتها على الشاشة، مرورا بتصميم الشخصيات والإهتمام بكل جزئية فيها بشكل متميز ورائع، كمان تحريك الشخصيات على الشاشة كان بيتميز طوال الوقت بالإنسيابية والقدرة على الإقناع والإراحة لعين المشاهدين، وتناسقات الألوان الخاصة بالشخصيات والديكورات وباقي عناصر الفيلم.

الفيلم بيحمل كتير من الرسائل السياسية والفلسفية وممكن يتم تفسير كتير من مشاهده وجمله الحوارية على أكتر من منظور، وده بيخلي متعة المشاهدة أكبر وبيخلي الفيلم مناسب للمشاهدة لقطاعات أوسع عمرياً من المشاهدين، ونقدر نقول بضمير مستريح أن الفيلم تجربة بصرية وعقلية ممتعة للكبار والصغار على حد سواء،  بل ممكن نذهب لأبعد من كده ونقول أن الفيلم تجربة متميزة للكبار بالذات علشان هايقدروا يفهموا كتير من جوانب الفيلم بعيدا عن اهتمام الصغار بالصورة الجذابه وخلاص.

Moana اللى انتجته شركة ديزني، واحد من احسن أفلام  الانيميشن اللى شوفناها فى 2016 ونتمني ينافس بقوة فى مباراة الأوسكار اللى بنستعد لها من دلوقت.

علشان تبقى عارف:

• أعلنت شركة (ديزني) في ديسمبر 2014 عن رغبتها في تقدم مترشحات لأداء دور (موانا)، وبالفعل تقدمت آلاف الفتيات لأداء الدور.
• الفيلم يعتبر ثاني أفلام ديزني بعام 2016 بعد Zootopia.