Mom and Dad: صرخة كوميدية في وجه الاباء

توليفة الفيلم الكوميدي المرعب توليفة خاصة من الصعب أننا نلاقيها غير في أفلام هوليود، وفيلم Mom and Dad قدر يلعب على التوليفة دي بشكل جيد على الرغم من بعض المشكلات على صعيد السيناريو.. تعالوا نتعرف على الفيلم عن قرب.

القصة

Mom and Dad بيحكي عن مرض أو هستيريا جماعية بتضرب الولايات المتحدة، وبتتسبب في تحول الأباء لكائنات عنيفة ضد الأبناء، الأمر اللي بيضع أبن وأبنة في مواجهة مع أهلهم للنجاة بحياتهم في جو بيجمع بين الرعب والفانتازيا في نفس الوقت.

فريق العمل

الفيلم من تأليف وإخراج بريان تايلور أما  البطولة فكانت من نصيب نيكولاس كيدج و أوليفيا كروتشيتشيا و لورينا دياز و جوزيف د. ريتمان و تيريزا كوك

الأداء التمثيلي

من الواضح في الأداء التمثيلي أن نيكولاس كيدج بيحاول بكل الطرق أنه يرجع من تاني لصدارة عالم التمثيل في هوليود. مؤخرا تعرض كيدج لسلسلة من العقبات والأفلام والاختيارات السيئة في مشواره الفني. لكن على الرغم من اختياراته الجيدة لكن كيدج مش قادر يفهم أن المشكلة ممكن تكون بالمقام الأول في التكلفة الأنتاجية لأفلامه، في اعتقادنا ان نيكولاس كيدج –بالأضافة لتحسين اختياراته- محتاج يحسن شركات الأنتاج اللي بيتعامل معاها بحيث يقوم ببطولة أفلام فيها شوية بذخ أنتاجي علشان يخرج الفيلم بشكل لائق في النهاية.

السيناريو والحوار والأخراج

سيناريو الفيلم كان جيد على الأقل في النصف الأول من الأحداث، وقدر يجبرنا على استكمال المتابعة للنهاية بدون الشعور بالملل، حوار الفيلم كمان كان ذكي وكان فيه بعض الجمل والمواقف الكوميدية، وفي النهاية نقدر نقول أن مستوى الفيلم اخراجيا كان جيد ويستحق المشاهدة.

الديكورات والموسيقى والأزياء

ديكورات الفيلم كانت متوسطة، أما الموسيقى التصويرية فكانت بحاجه أنها تكون أفضل بكتير، علشان تعلق في دماغنا ونشعر في النهاية أننا عاوزين نسمعها بشكل منفصل عن الأحداث، والحقيقة أن النوعية دي من الأفلام مش بتركز على الديكورات والموسيقى بقدر تركيزها على السيناريو والأحداث.

الخلاصة

Mom and Dad فيلم رعب مع لمسة كوميدية وبيحاول يوجه رسالة للأباء والأبناء على حد سواء.

علشان تبقى عارف: تقييم الفيلم على موقع IMDB 5.5 من 10