Money Monster : المال أصل كل الشرور!
البورصة.. ترابيزة القمار الممتدة على إتساع العالم، اللون الاخضر المحبب للسهم المرتفع الرابح واللون الأحمر الكريه المُعبر عن السهم الخاسر.. مليارات الدولارات بتنتقل من مكان للتاني فى ثواني معدودة، ثروت بتتعمل وثروات تانيه بتضيع فى دقايق محدودة… هو ده العالم اللى بيحكي عنه الفيلم… على الاقل فى النصف الأول من الأحداث!
من إخراج جودي فوستر وبطولة جورج كلوني وجوليا روبرتس بنشوف قصة مقدم برنامج إقتصادي عن تحليل أسهم البورصه إسمه Money Monster.. مقدم البرنامج (جورج كلوني) بيتم أخذه كرهينه فى الإستوديو على الهواء مباشرة، واللى بيخطفه واحد خسر أمواله فى البورصه بناء على نصائح كلوني الغير سليمه، بنعرف بعد كده إن الموضوع له أبعاد أكبر بكتير من كده.. بس دي أحداث مش عاوزين نحرقها عليكم قبل مشاهدة الفيلم.
جوليا روبرتس بتلعب دور مخرجة البرنامج واللى بتجد نفسها فى موقف لا تحسد عليه بين عدم قدرتها على إيقاف البث على الهواء، وبين محاولتها إنقاذ مقدم البرنامج من القتل من خلال الإستجابة لطلبات المُختطف، ونقدر نقول إن أداء الثلاثي جورج كلوني و جوليا روبرتس و جاك أوكونيل كان متميز، خاصة كلوني واللي ظهر بشكل مختلف عن باقي أعماله اللى شوفناها له قبل كده.
ذكاء القائمين على الفيلم تمثل فى بساطة الديكور اللى تم تصوير الفيلم فيه.. الديكور فى 98% من الأحداث كان ديكور البرنامج اللى بتحصل فيه حادثة الإختطاف، و2% لبعض مشاهد التصوير الخارجيه، ودي نقطة إنتاجية ذكية جعلت الفيلم يتكلف ميزانية قليلة.
بنعيب على الفيلم ضعف الموسيقي التصويرية وعدم قدرتها على الإنسجام مع الأحداث، كمان الربع الأخير من الأحداث حسينا فيه بتطويل وعدم منطقية فى السيناريو، وبدأ شبح المبالغة يتسرب لأحداث الفيلم اللى كانت منطقية تماماً فى البداية.
Money Monster فيلم ظريف وخفيف بيتناول أمور إقتصادية بتأثر على حياتنا اليومية بطريقة ذكية ومُختلفة، وبعيداً عن تعقيد بعض الأفلام التانيه زي The Big Short واللى كان معقد وغير مفهوم فى جانب كبير منه، لكن فى نفس الوقت مانقدرش نقول إن الفيلم ممتع زي The Wolf Of Wall Street على سبيل المثال.
