Monster Family: أنيميشن عن عائلة تتحول لوحوش شكلها قبيح

منذ فترة طويلة لم نشاهد فيلم أنيميشن قوي ويستحق الاهتمام وقادر على اثارة انتباهنا وضحكاتنا في نفس الوقت. لكن هل قدر فيلم Monster Family انه يوصلنا للحالة دي فعلا؟ ده اللي هانعرفه مع بعض من خلال مقالنا عن الفيلم.

القصة

الفيلم بيحكي عن أسرة صغيرة بتحاول أحدى أفرادها (ايما) أنها تعيد التواصل بين أفرادها من جديد وتنشر بينهم السعادة وتخليهم أسرة سعيدة، لكن كل مخططاتها بتنتهي لما بتحل على الأسرة لعنة بتحولهم فيها لوحوش شكلها شرير. هل هاتقدر الأسرة تتخلص من أسر اللعنة وترجع الحب بين أفرادها تاني؟ هو ده اللي بنتابعه مع بعض.

فريق العمل

الفيلم من تأليف ماثياس بارشتكا و كريستي فالكوس ومن أخراج  هولجر تابي وبطولة  إميلي واتسون  و جايسون إيزاك و نيك فروست و جيسيكا براون فيندالي و سيليا إمري

الأداء الصوتي

لازم نشيد بالأداء الصوتي لكل أبطال الفيلم، وعلى رأسهم ايميلي واتسون واللي قامت بدور إيما، واللي كان أدائها الصوتي مميز الى اقصى حد، على الرغم من نوعية الأفلام المختلفة اللي بتشارك فيها في الوقت العادي. لكن يبدو أن نجاح تجربتها في فيلمنا شجعتها على المشاركة في أفلام انيميشن تانيه هايتم عرضها قريبا.

السيناريو والحوار والأخراج

سيناريو الفيلم اعتمد على المواقف الكوميدية بأكتر من اعتماده على الايفيهات المضحكة ودي حاجه تحسب للفيلم وصناعه، لكن مانقدرش نغفل أن الحوار في الفيلم وقع عليه أكتر من عبء الكوميديا فقط، لكن كمان توصيل رسالة الفيلم وهي ضرورة أننا نبحث عن السعادة ونكون في محيط أسرنا حالة من الحب والسعادة.

إخراج الفيلم وعلى الرغم من مجهوده لكن من الواضح أنه كان بيقوم باللي عليه بدون شغف زائد أو حب أن الفيلم يخرج كعمل قوي ومتماسك، وعلى الرغم من عدم تأثير ده على الفيلم في صورته النهائية لكنه سرب عندنا كمشاهدين إحساس أننا بنتفرج على فيلم نمطي وغير استثنائي.

التحريك والموسيقى والخدع

تحريك الشخصيات الأساسية في الفيلم كان جيد، على الرغم من بعض البطء في بعض المشاهد لكن النتيجة النهائية كانت جيدة، وكان في اهتمام بالتفاصيل الصغيرة وباستخدام الرسامين لقدراتهم لتقديم متعة بصرية، لكن الخدع والمؤثرات الخاصة كانت محتاجه تكون أكثر تنويعا وأكثر قوة من اللي شوفناها في النهاية على الشاشة، كمان الموسيقى التصويرية للفيلم كانت غير مؤثرة اطلاقها وحسينا أنها كانت محتاجه تكون أقوى وأفضل.

الخلاصة

فيلم Monster Family مش أحسن فيلم أنيميشن شوفناه مؤخرا، لكنه تجربة جيدة تستحق المشاهدة وننصح بيها كل اللي عندهم أطفال صغيرة بتحب تتفرج على أفلام الأنيميشن.

علشان تبقى عارف:

الفيلم بيعرض تحت أسم أخر هو Happy Family