Monster Island: فيلم أنيميشن بقصة مبتكرة
من أكثر الحاجات المميزة اللي بتعجبنا في أفلام الأنيميشن. أن كتير منها بيكون صالح لمشاهدة الكبار والصغار على حد سواء. وده بيظهر من نوعية الأعمار اللي بنلاحظ أنها بتتفرج على أفلام الانيميشن في السينما. التنوع العمري اللي ممكن نقول أنه زي الشعار اللي كان بيتكتب على المجلات زمان: (من سن 9 الى 99)!
فيلم Monster Island من الأفلام اللي ممكن الكبار أو الصغار يتفرجوا عليه، الفيلم بيحكي عن الطفل الصغير لوكاس، واللي بيكتشف أنه مش أنسان! الاكتشاف اللي بيقلب حياته كلها وبيدخله في مجموعة من المواقف اللي كلها كوميديا ومغامرات في نفس الوقت.
الجميل في الفيلم أنه بيحفزنا على تقبل أنفسنا، وأننا نسعى أننا نعرف نفسنا على حقيقتها ونتقبلها ونطورها في نفس الوقت، وازاي الانسان ممكن يستغل قدراته علشان يكون أحسن ويحقق النجاح في حياته. كل دي قيم اتعلمناها من مشاهدتنا للفيلم بشكل غير مباشر وده واحد من أفضل الأمور في الفيلم.
الأداء الصوتي لأريك لارسون وجوي كامين و فيونا هاردينجهام وباقي أبطال الفيلم كان مميز، وكان من الواضح عليهم تشبعهم بالقصة وشعورهم بيها، الأمر اللي انعكس على أدائهم الصوتي ودي حاجه مش سهله على الممثلين أنهم يوصلوا لنا مشاعرهم من خلال صوتهم فقط.
نظام حركة الشخصيات على الشاشة على الرغم من جودته لكن كان مختلف شوية عن اللي اتعودنا عليها من الأفلام الأمريكية عالية التكلفة الأنتاجية، لكن قوة الأداء الصوتي وباقي عناصر الفيلم ساعدت على تخطينا النقطة دي بسرعة واندماجنا في الأحداث، خاصة مع الموسيقى التصويرية القوية.
لو كنتم من محبي أفلام الأنيميشن اللي فيها قصة أو درس مستتر، ولو عاوز تتفرج على فيلم يناسب المرحلة العمرية اللي انت فيها أيا ما كانت، ننصحك في الحالة دي تتابع احداث Monster Island اللي هاتجدها قوية ومميزة وتستحق المتابعة.
علشان تبقى عارف: تقييم الفيلم على موقع IMDB 4.8 من 10
