Monster Trucks : فيلم مغامرات مناسب للأجازات
هواية تربية الحيوانات الأليفة هواية معروفة ومفهومة.. ناس كتير بتحب يكون عندها كلب صغير أو قطة جميلة أو حتي حوض سمك. لكن فكرة أن يبقى عندك حيوان رخوي غير معروف شبه كلب البحر، وأنك تربيه داخل محرك سيارتك، كل ده أمور مش بنشوفها غير فى السينما، وتحديدا فى فيلم Monster Trucks اللى عرضته السينمات المصرية مؤخراً وتحديداً مع بداية موسم أجازة نصف السنة.
Monster Trucks من إخراج كريس ويدج وتأليف جلين بيرجر، ومن بطولة لوكاس تيل و جان ليفي و روب لوي و ايمي ريان.
الفيلم بيبدأ بمشاهد افتتاحية لعملية تنقيب عن النفط بتتحول لمشكلة كبيرة، لما بيواجه القائمين على عملية التنقيب منطقة مجوفة تحت الأرض فيها مياة ومظاهر حياة، لكن الجشع وحب الحصول على البترول بيجعلهم يتجاهلوا فكرة وجود حياة تحت الأرض ويخترقوا المنطقة بأدواتهم، الأمر اللى بينتج عنه حادثة كبيرة بتتحول لحديث الصحافة والإعلام اللى بتحاول المؤسسة المنقبة عن البترول إبعادهم بأي شكل علشان تقدر تاخد النفط الموجود فى المنطقة.
بعيدا عن كل الأحداث دي بنبدأ نتعرف على بطلنا تريب اللى بيقوم بدوره لوكاس تيل، واللى بيحاول يجمع سيارة أحلامه من خلال بقايا السيارات الأخري، بحكم عمله فى منطقة التخلص من السيارات الخردة، لكن الصدفة وحدها بتسوق اليه الكائن الخرافي اللى هرب من موقف التنقيب عن النفط، واللى بيستخبي فى الجراج الخاص به.
العلاقة بين الكائن العجيب وبين تريب بتبدأ بسوء فهم كبير، ثم بتتحول لما يشبه الصداقة لما يستبدله تريب بمحرك سيارته، وتبدأ حالة من المطاردة بين شركة النفط اللى عاوزه تقتل الكائن ده وبين تريب اللى بيحاول يحافظ على حياته وحياة الكائن الغريب اللى أصبح فجأة فى عهدته.
الفيلم بيقدم مجموعة من المشاهد القوية واللى مثلت أختبار حقيقي للمؤثرات الخاصة والخدع السينمائية، زي مشاهد المطاردة بالسيارة، أو مشهد سباحة الكائن الغريب فى النهر على سبيل المثال، وكلها كانت مشاهد صعبة لكن تم تأديتها بذكاء وبتوظيف متميز للمؤثرات الخاصة، يحسب للقائمين على الفيلم.
معلومة على الطاير: تقييم الفيلم على موقع IMDB كان 5.5 من 10 وعلى موقع rottentomatoes كان 56%
أما الأمور اللى بنعتبر القائمين على الفيلم فشلوا فيها فكانت عناصر الديكور والموسيقي وحتي زوايا التصوير وصناعة الكادرات… ويمكن كل العناصر دي تكون مش مهمة جداً لما يتعلق الأمر بفيلم مغامرات موجه بالمقام الأول للمراهقين، لكن برضو هى عناصر لا يمكن اغفالها تماما ولازم نتكلم عنها فى مجمل كلامنا عن أحداث الفيلم.
Monster Trucks فى رأينا بيقدم مغامرة لا بأس بها لمدة حوالي ساعتين، وبنعتقد أنه بيخاطب فئات عمرية بتهتم بالمغامرة والحركة أكتر من أي شىء أخر، علشان كده من حظهم الكويس أنه تم طرح الفيلم فى موسم إجازة نصف السنة، وهو موسم ممتاز للباحثين عن النوعية دي من الأفلام.
علشان تبقى عارف: الفيلم يعتبر أول فيلم حقيقي (مش رسوم متحركة) للمخرج كريس ويدج
